State Referral Hospital-a hman tur Khawl leina zat leh supplier hriat a ni lo

Sorkar term hmasaa policy pakhat, New Economic De­ve­lopment Programme (NEDP) hnuaia district hrang hranga damdawi-in thuam ṭhat zingah, State Referral Hospital, Falkawn tan kum 2016-17 chhung khan hmanrua Rs. 16,07,67,763 man lei a nih thu tarlan a ni a; mahse, hmanrua zinga leina pali leina man zat leh a supply-tu (approved firm) hriat a ni lo.

Kumin March thlaa Assembly Budget Session-ah MLA pakhatin unstarred question hmanga a zawhna Health Minister-in March 18, 2019-a a chhannaah State Referral Hospital tana medical equipment lei zawng zawng, leina rate leh supplier-te hmuh theihin a awm. Kum 2016-17 atana State Referral Hospital-a department hrang hrang tana hmanraw lei zawng zawng te, leina rate leh supply-tu approved firm-te tarlan vek a ni.

Zawhna chhannaa a lan danin, State Referral Hospital Department of Radiology hman turin CT scan pakhat lei a ni a, 128 Slices (Turnkey Installation) tih niin, leina man (rate) leh supplier (approved firm) erawh tarlan a ni lo. Hetih lai hian, Referral Hospital-a thawkte chuan, CT scan chu '16 Slice' nia an hriat thu Vanglaini palai an hrilh.

CT scan hi April 12, 2019 (Zirtawpni) thleng kha chuan hman theih lohin a la awm a, a báwmah khung a la nih avang leh hman theiha bun theih a la nih loh avangin slice zat chu 16 nge, 128 tih hriat chian theih a la ni lo. Radiology department-a hman tur tho film dryer (50 film) pawh a rate leh supplier tarlan a ni lo bawk.

Health Minister leh Secretary-te chuan tun hnai khan CT scan dahna tur pindan an enfiah a; a dahna tura siamah tui a luh theih vanga hun rei tak hman theih loha awm chu a dahna tur hmun pindan dang an ruahman a, MRI dahna tur satu tho hna an thawh ṭhattir nia thu dawn a ni.

Department of Paediatric Surgery-a hman tur 'Magnifying loupe set' LED light source pakhat lei a ni a, Department of Orthopaedics hnuaia mi 'Instruments and Implants for external fixator' pakhat lei a ni bawk. Heng department pahniha hmanraw leite hi a rate leh approved firm tarlan a ni lo.

Hmanraw leite chu depart­ment lamin a rate an hriat loh, tarlan loh 31 a awm a, ṭhen-khat chu a zat leh sum zat aṭanga chhûta hriat chawp ngaite a ni. Hmanraw dang zawng zawng chu a rate, amount leh approved firm-te felfai taka tarlan a ni thung.

Hmanraw leina zawng zawng belhkhawm chu Assembly document-ah Rs. 16,07,67,763 a nih laiin, department mal ṭheuha hmanraw lei zawng zawng atana sum sên belhkhawm chu Rs. 16,01,93,553 a ni thung a; Assembly document-ah hian Rs. 5,74,210-in a tam zawk. Sum tam tham leh chi hrang hrang tam tham tak belh khawm a nih avangin, ṭum eng emaw zat belh ni mah se, belh sual palh erawh a awm theia ngaih a ni.