Thliin in ṭhahnem tak a tichhia

Nimin zing dar 9 vel khan Mizoram hmar lamah thlipui a tleh a; Vairengte leh a chhehvel khaw hrang hrangah in eng emaw zat a nuai chhia. Hriat theih chinah, in 13 chu luah zui tlak lohin a chhia a ni.

Vairengte aṭanga Vanglaini thu dawn danin, Vairengteah chuan in 20 chuang thlipuiin a nuai chhia a, chu'ng zinga paruk chu luah zui tlak a ni lo. In luah zui tlak loh zinga pali chu mimal in a ni a, a dangte chu Forest department quarters leh UPC (NEI) naupang biak-in a ni. Khawtlangin a theih ang angin in thawm ṭhat theihte chu nimin khan an thawm ṭha nghal.

Saipûm khuaah chuan in 12 a chhia a, chu'ng zinga pali chu luah zui tlak a ni lo. Saiphai khuaah pawh in pariat a chhia a, pathum chu luah zui tlak loh a ni. Saihapui-V khuaah pawh in chhia eng emaw zat a awm a, thing tlu leh electric ban tlu a awm nual.

Thlipui hian in a tihchhiat bakah, thingkung eng emaw zat leh electric bante a chhêm tlu a ni. He thu ziah lai thleng hian Vairengte leh a chhehvel khuate chuan power supply an la hmu thei lo. He chhiatna thleng vang hian nimin khan Serlui bialtu MLA Lalrinsanga Ralte chuan Vairengte a pan a ni.