KHAWTHLIR
Fire Service Week
Nimin aṭang khan Mizoram hmun hrang hrangah 'Fire Service Week' hman ṭan a ni a, April 20 thleng a awh ang. Fire Service Week chhung hian kangmei laka mipui kan him theihna atan kawng hrang hrangin inzirtirna kalpui a ni dawn a, thupui atan 'Kangmei laka inven hi kangmei ṭhelh aiin a ṭha zawk' tih a ni.
World Health Day
MIMER (State Referral Hospital)-a Community Medicine department huaihawtin nimin khan MIMER-ah World Health Day pualin hun hman a ni a, Health secretary H Lalengmawia'n a hmanpui.World Health Day puala hun hman hi MIMER associate professor Dr Anil Korparkar chuan a kaihruai a; H Lalengmawia chuan, Mizoram sorkar Health department-a thawktute chu, sorkar thil tum tihhlawhtlinna atana an pawimawhzia leh an hnathawhte an nunpui a ngaih thu a hrilh. Department of Community Medicine head of department Prof. Swati M Patki-in universal health coverage chuangchang leh World Health Day hman chhante a sawifiah.
CEO-in lawmthu sawi
Lok Sabha inthlan neih zawh taka vote thlak tura thawk chhuak zawng zawngte hnenah chief electoral officer (CEO) Ashish Kundra chuan lawmthu a sawi. CEO chuan thuchhuah siamin, vote thlaktute leh inthlan buaipuitu official ṭha-
hnemngaihna vangin Lok Sabha inthlanah vote tla a tam phah niin a sawi a, "A bik takin kum upa lam leh rualbanlote zingah vote a tla ṭha niin ka hria a, ṭhalaite pawhin ṭum dang aiin vote an thlak ṭha niin kan hria," a ti a; hma lam huna inthlanpui la neih leh zel turah pawh ṭhahnemngai taka vote thlak ṭhin turin Mizoram mipui a chah a ni.
ASEP-in dem
Association for Environmental Preservation (ASEP) chuan thuchhuah siamin, nimin khan Bilkhawthlir khaw chhungah Mizoram state animal - sazâ (serow) hliam chau tak hmuh a ni a, Bilkhawthlira Forest department hnathawkte leh YMA hruaitute'n an buaipui nghal tih an tarlang. ASEP chuan, "State animal saza chunga kutthlakna a thleng mawlh mawlh mai hi a lungchhiatthlak tak zet. Pawi khawihtute kan dem a, man an nih chuan dan anga hremna lek ngei kan phût tlat a ni," an ti.