MRPS Act inzirtirna hun buatsaih a ni

Nimin khan Serchhip leh Champhaiah 'The Mizoram Right to Public Services (MRPS) Act 2015' inzirtirna hun buatsaih a ni.

Inhrilhriatna hun hi Champhaiah chuan Vengsang YMA Hall-ah DPAR leh IPR department bultuma buatsaih niin, Champhai IPRO Dr Lallawmkima'n a kaihruai. Khuallian, Champhai MJA president C Lalhnunpuia chuan, kum 2015-a siam tawh MRPS Act mipuite'n an la hmelhriat tâwk lo chu pawi a tih sawiin, "MRPS Act hi khua leh tuite tan liau liau tura siam, dan ṭha tak a ni. State dang 17-ah pawh hetiang dan hi kalpui a ni tawh. Inbiakpawhna lam a ṭhat tawk loh avanga dan siamte ṭha taka kenkawh a harsat ṭhin," a ti.

C Lalhnunpuia chuan, MRPS Act chu sorkarin mipui dikna chanvo pek a batna dan a nih thu sawiin, "Mipuite pawhin an chanvo an hriat a

ṭul ve bawk. He dan hi sorkarin mipuite chunga mawhphurhna a neihte hriattirna leh ngaih pawimawhzia lantirna ni," a ti a; dan hnuaiah hian hun bituk chhungin mipuiten sorkara mamawh an thlente pek an nih tur thu leh chutiang a tih a nih loh chuan mawhphurtu department chungah hremna lek theih a nih thu a sawi.

Dan inzirtirna hunah hian zirlai naupang, zirtirtu, tlawm­ngai pawl aiawh leh thuthar theh­darhtute an tel a, district level master trainer on MRPS Act, 2015 Laldinfeli'n mipuite'n an hriat tur pawimawhte a sawi a ni.

MRPS Act inzirtirna hun hi Serchhipah chuan New Ser­chhip YMA Hall-ah buatsaih a ni a; khuallian Serchhip district MJA president C Ramengmawia chuan, MRPS Act hi kum 2015 aṭanga hman ṭan ni tawh mah se, mipuiin an la hmelhriat lo hle tih a sawi a, "Dân kan hriat loh avang­in sorkar aṭanga hun rei lote chhunga kan hmuh turte pawh rei tak tak kan nghak fo ṭhin a, a pawi hle a ni. He dan hnuaiah hian sorkar department panga seng luh tawh niin a lang a, department dang pawh seng luh an nih zel beisei ila, an seng luh tam poh leh mipui tan a hlu zual dawn a ni," a ti.

Resource person K Sai­tluanga, Serchhip IPRO sawi danin, MRPS Act hnuaiah service 46 seng luh tawh a ni a, chung service neitu department-te chu Transport, Taxation, Social Welfare, Rural Development, Finance leh PHE department an ni.

Mizoram sorkarin mipuite hnena 'service' chi hrang hrang a pek chhuah ṭhinte hunbi tiam chhung ngeia a pek chhuah ṭhinna tur dan 'The Mizoram Right to Public Services Act, 2015' hi December 1, 2015-ah hman ṭan a ni.

He dan hian India khua leh tuite chu sorkarin service a pek chhuah ṭhinte dilna an thehluh aṭanga hunbi tiam chhunga an dawn ngei ngeina turin dikna chanvo a pe. Dan hian Mizoram pum a huam a, Sixth Schedule hnuaia autonomous district council-te erawh chu an ADC sorkarin an la chhawng a nih loh chuan a huam ve lo thung.