Bawhzui turin ZPM-in CEO an ngen

ZPM Vigilance department hotute chuan nimin khan Mizoram joint chief electoral officer (joint CEO) H Lianzela an hmu a, Mizoram state lottery chungchanga CEO-a complaint an theh­luh chu bawhzui a ni loa an hriat avangin, na zawka bawhzui tura an duh thu an thlen.

ZPM leader leh ZPM Legislature Party leader Lalduhoma chuan Election Model Code of Conduct hman a nih mek laiin, Mizoram sorkarin tender ko loa lottery distributor tur a thlan danah thil dik lo a awma a lan avangin April 5, 2019-ah Chief Election Commissioner hnena complaint a thehlut a; chumi chung­changah chuan ZPM-te chuan nimin khan chief electoral officer Ashish Kundra hmuh an tum a, a awm loh avangin Joint CEO an hmu a ni.

ZPM tarlan danin, MNF sorkarin lottery distributor tura a thlante chu Congress sorkar lai leh MNF-te opposition an nih laia mi, MNF nasa taka an sawisel leh Lottery office pawh an hual phah hialte tho an ni a; Model Code of Conduct hman tawh hnu, March 15, 2019-ah State Lottery Committee (SLC)-in agreement an siampui a ni.

SLC-in agreement a siampui palite chu - M/s Teesta Distributor, M/s NV International, M/s Summit leh M/s E-Cool Gaming Solutional-te an ni a; E-Cool Gaming Solution erawh an inhnuhdawh avangin an chanvo tur chu distributor dang pathumte'n an insem a ni. Heng thilte hi chief minister Zoramthanga'n a pawmpui thlap niin an sawi.

ZPM Vigilance department chuan, lottery kalpui dan chu dan palzûtna a nih bakah Model Code of Conduct bawhchhiatna a nih avang­in Mizoram sorkar chu titawp turin an phut tih an sawi a, "Congress ministry hun laia na taka an sawiselte tho rem leh rem lo ngaihtuah loa uchuak taka pek tumna awm leh hi MNF sorkarin principle an neih lohzia tilangtu a ni a, corruption nen bul an ṭanzia tilangtu chiang tak a ni," an ti.

Model Code of Conduct bawhchhiate chunga hmalak danah Election official-te chu rualkhai leh dik taka hma la ṭhin turin ZPM Vigilance department chuan an phût tih an sawi bawk.