Tun sorkarin a ngaih pawimawh ber chu Education hi a ni - Minister Lalchhandama

School Education minister Lalchhandama Ralte chuan nimin khan School Education directorate a tlawh a, department secretary Esther Lalruatkimi hoin officer leh thawktute'n an lo dawngsawng. Minister chuan, zirna chu MNF sorkar ngaih pawimawh ber a nih thu a sawi.

Lalchhandama Ralte chuan thu sawiin, "Tun sorkarin a ngaih pawimawh ber chu education hi a ni. Kan Chief Minister-in zirna hi a ngaih pawimawh avangin thil ṭul kan sawi a­piang chu a remti nghal zel thei a ni," a ti a; chuvang chuan Education department-a thawkte hlawh bat an tum loh thu leh, hna thawktu chuan hlawh a hmu tur a ni tih chu kalpui an tum thu a sawi.

Minister chuan, zirtirtu post ruak 2,300 dáwn a awm tih sawiin, "Post ruak a tam avang hian tun academic session ṭan tirhah pawh primary school 13 chuan zirtirtu an nei lo a, inthlan vuakvêt avangin transfer leh posting a tih theih si lo a, an ṭhenawm sikulte kan hmuitir mek a, siamrem theih a châkawm tawh hle a ni," a ti.

Zirtirtu mamawh phuhrûk nan thing­tlang hmun hrang hrangah MLA fund aṭang te, ni za inhlawhna aṭangte leh zirtirtu thawk laite hlawh aṭangtein zirtirtu an ruai tih sawiin Lalchhandama chuan, "Hna­tlanga thawh luih luih reng hi ṭha kan ti lo a, kan indaih lohna phuhruk nan MR teacher sang khat dawn la turin sorkar a inbuatsaih mek a ni," a ti a; muster roll-a zirtirtu lak turte chu skill-II level-a hlawh pek tum a nih thu a sawi.

MR teacher lakna turah a theih chin chinah a khaw mi emaw, a bul hnai khuaa mite emaw duhsak an ni dawn tih sawiin Minister chuan, "Transfer kherh kherh lo tur lak an ni dawn. Post ruak hnawhkhat tur hian MPSC kut nghak ila, hna an ngah a, a rei lutuk dawn a, Education hi a tluchhe hman mai ang. Sorkarin a tih tur a hria a, a ti phawt dawn a ni," a ti.

R Lalchhandama hian School Education department-a thawkte chu office ṭan hun leh bàn hun ngai pawimawh tur te, anmahni dawrtu apiang ṭha taka dawngsawng tur te, sorkar thurûk vawn kawnga rinawm turtein a chah bawk. School Education Minister hi MLA pahnih - C Lalmuanpuia leh L Thangmawia ten an ṭawiawm a ni.