Election R.O-in FIR a thehluh Duhoma'n mak a ti

ZPM leader Lalduhoma chuan nimin khan an pawl pisaa inkhawm­ah thu sawiin, April 11-a Lok Sabha inthlan leh Assembly bye-election-a MPCC & ZPM candidate-te leh an chhungkuate'n theihtawp an chhuah avangin lawmawm a tih thu a sawi a; Vanglaini chanchinbu-in party symbol an tihsual chungchangah election returning officer-in FIR a thehluh chu mak a tih thu leh a vawi khat hriatna a nih thu a sawi bawk.

Lalduhoma chuan, inthlanah eng result pawh awm se, Pathian remruat­ah ngaia pawm thiam tura inbuatsaih a ṭul thu sawiin, "Bible-in engkim tan hun ruat a awm a ti a. Thawhho ṭul cháng a awm a, indo cháng a awm a, a chángin kan thawkho a, kan inbei leh a, kan inbei zo hlawl a, kan thawkho leh a, chu­tiang reng reng chuan politics-ah kan kal ṭhin," a ti a; chutiang chu tun ṭum inthlana an khingpui ber MNF-te kal dan a nih ve thu a sawi.

Vanglaini chanchinbua party symbol tihsual chungchangah Duh­oma chuan, "Vanglaini chanchinbu tihsual hi kan tuar ber a, kan chhiatpui ber bawk. MNF-in an hlawkpui ber a ni. MNF hian hlâwkpui pawh an tum hle a, a chet pawh an che rang. Pu Tetea tana chhiatna thlen thei thil, MNF tana ṭhatna, auhla ṭha tak, MP leh MLA-a kan candidate-te leh anmahni thlawptute dem theihna tur point ṭha tak siam theitu a nih avang hian, keini tan chuan hlâwkpuina kan neih lohna thil a ni," a ti.

Lalduhoma sawi danin, Vanglaini tihsual vangin vote thlak ní-ah DC/RO hnenah K Sapdanga, F Roding­liana leh R Vanlalvena te an lêng nghal a, Lalnghinglova Hmar chu show cause notice pek a tum a nih pawhin, a dawng turin a dawn hma chuan tih leak-out loh ni se tiin an ngen a ni. Mahse, DC office an chhuahsan rual rualin DC office aṭang­in a leak-out nghal a, show cause notice chu a dawng turin a dawn hmain social media-ah a darh vek tawh a ni.

ZPM Leader chuan, Aizawl DC chu inthlanah returning officer a nih thu sawiin, "RO chu inthlan chhunga thubuai awm apiangte lo dawngsawng a, a ṭul anga hma la tur an ni. Complaint thehluhna tur, a dawngtu tur a nih laiin, amah ngeiin FIR a thehlut zawk tlat mai hi, hetiang hi kan vawi khat hriatna a ni a, thil dangdai tak tun ṭumah hian a thleng a ni," a ti.

Lalduhoma chuan, MNF party mite'n thu dik lo an vawrhdarh nasa hle tih sawiin, "Pu Tetea hi MP atana thlan tlin pawh ni se, disqualify leh tur anga MNF-te'n an sawi phei hi chu thu awmze nei lo tak zet a ni a, 'Tlawng vuaka Mat dap' an tih ang chauh a ni. He thilah hian hlauhthawn tur a awm lo a, a case hi a tênau a, kan hrik a tithak tham lo," a ti a; lungngaihna tur a awm loh thu a sawi.

Inkhawmah hian Aizawl West-I by-election-a MPCC & ZPM thlawp independent candidate Lalbuanga Sailo pawhin thu a sawi a ni.