Mizoram tlu chhe mek tungding leh turin Pathianin MNF a thlang - Ramthanmawia

MNF MLA Ramthanmawia chuan nimin khan Mizo Hnam Runah thu sawiin, "Kan sorkar hi Pathian mite leh thlarau mite ṭawngṭaina rah chhuah a ni. He ram tlu chhe mek tungding leh turin Pathianin MNF a thlang a ni," a ti.

Inthlan dawn khana anmahni beitute beih dan kha mipui awih zawk tak a nih thu sawiin Ramthanmawia chuan, "Congress ni lo, MNF ni lo' an ti a, mipui pawh an thle dual dual a ni. Mah se, MLA 26 lai Pathianin min pe tlat thung a ni. Kan pu ber Pu Zoramthanga hi ama insawi ṭhin angin, Zoramthanga thar, Chief Minister thar a ni tawh. Kan pu ber inhlanna hi chunglamin 'amen' a ti a ni," a ti a, MNF sorkar thar lo piang chu party sorkar anga a kal thian tawh loh thu a sawi.

Ramthanmawia chuan sorkar tharah CM, mi­nister leh MLA-te chu anmahni an intheihnghilh a ngai tih sawiin, "Kan party worker lian zawng zawngte pawh mahni intheihnghilhin mipui tan rawng kan bawl tur a ni. Pathian duhzawnga kan kal chuan term hnih chu sawi loh, term thum leh a aia tam pawh kan sorkar thei a, ṭawngṭaina nen kan kal mar reng a ngai a ni. MNF chu 'Pathian leh kan ram tan' titu kan nih avangin kan danglam bik a, belhchian kan dawl tur a ni," a ti.