MNF sorkarah Bru an huangtau - MPCC & ZPM

MPCC & ZPM Publicity Committee chuan thuchhuah siamin, MNF sorkarah Bru an huangtau hle niin an tarlang a; Lok Sabha inthlan dawnah Bru-te'n MNF candidate C Lalrosanga hnenah vote thlak tura Tripura-a an camp-a hawna tur sum an dil tih an sawi.

MPCC & ZPM chuan, Mizoram Bru Displaced People Forum, BRO National Liberation Front leh Bru Welfare Committee ten MNF MP candidate C Lalrosanga hnena Tripura camp-a vote thlak tur Bru Aizawla awmte hawna tur sum leh pai an dil tih an sawi a, "Hetiang­a an dil ngam hian MNF sorkara Tuikuk huangtau tâkzia a lantir chiang hle-ah kan ngai," an ti.

An tarlan danin, Tripura camp-a vote thlak tura Bru, Aizawla awmte'n an hawna tur sum leh pai March 30, 2019-ah MNF official candidate C Lalrosanga hnenah dilna lehkha an thlen a; MNF Candidate hnenah hian Tripura-a vote thlak tur Aizawla awm Bru mi 85 velte hawna tur, mi pakhatah tan Rs. 1,000 den den an dilsak a ni.

Sum dilna lehkhaah hian Bru pawl hrang hrang aiawhin MBDPF general secretary Bruno Mesha, BRO National Liberation Front secretary Mohan Reang leh Bru Welfare Committee (Tripura Relief Camp) secretary Indera Lal Reang ten hming an ziak a; MNF Hachhek (West) Block president LT Sanga hming a chuang bawk.

MPCC & ZPM chuan, MNF Hachhek (West) Block-in Tripura-a vote thlak tura Bru-te Aizawl aṭanga an hawna tur sum leh pai MNF party MP candidate hnena an dilpui chu an dem thu an tarlang a, "Mizote thlavang hauha theihtawpa ram leh hnam chhan tuma beitu NGO Coordination-te'n heti khawpa Mizoram himna atana hma an lak lai leh Mizorama lo haw duh lo Tuikukte vote thlak theihna tur sum leh pai an party official candidate hnena an dilpui hi kan dem tak zet a ni," an ti.