Zu licence tihnun theih a ni
Excise & Narcotics department (END) chuan April 15, Thawhṭanni khan notification tichhuakin, zu dah khawmna (bonded warehouse) leh zu zawrhna dawr (liquor vendor)-te tan May 27, 2019 thleng licence tihnun (renew) theih a nih thu an tarlang.
END notification tarlan danin, liquor licence renew fee chu an renew hun leh a rei zawng aṭanga chhût tur a ni. Notification hi Gauhati High Court, Aizawl Bench-in April 13, 2019-a order vanga tihchhuah a ni.
Tarlan tawh angin, bonded warehouse leh liquor vendor-te licence hi March 31, 2019 khan a tàwp a, sorkar chuan tihnun (renew) zui zel a phal tawh lo a ni. High Court-in April 13-a order a chhuah hnuah, bonded warehouse leh liquor vendor zingah an licence thi tawh tinung (renew) leh tawh an awm nia thu dawn a ni.
Zu zawrh chungchangah hian, bonded warhouse neitute chu Gauhati High Court-ah an zualko a, High Court chuan April 13 khan order tichhuak in, zu khapna dan The Mizoram Liqour (Prohibition) Act, 2019 hman theih loh hun chhung, May 27, 2019 thleng zu zawrhna dawrte hawntir leh turin Mizoram sorkar a hriattir a ni.