Nationalism tuh thei tur zirlaibu Siam a ṭul - Education Minister

School Education minister Lalchhandama Ralte chuan nimin khan State Council of Educational Research and Training (SCERT) pisa a tlawh a, SCERT-a thawkte'n lo dawng-sawngin, an inkawm a, Mizo nationalism tuh thei tur zirlaibu siam a ngaih thu a sawi.

Lalchhandama Ralte chuan, zirnaah hmasawnna tluantling nei turin hnam rilru tela zirlai kalpui tur a nih thu sawiin, "Textbook kan buatsaih leh turah pawh Mizo nationalism tuh thei tura zirlaibu kan siam a, kan buatsaih a ngai. SCERT hi zirtirtute training petu a nih avangin sorkar hnathawk dang ang an ni lo a, inthlahdah thei an ni lo," a ti.

SCERT thawktute leh B.Ed zirlaite fuihin Lalchhamdama chuan, "Kan hnathawhna hi mission field-ah ngaiin, Pathianin he hna thawk tur hian min ko tih chian a ngai," a ti a; hna petu Pathian duh dan tipuitling turin a chah.

School Education Minister chuan, SCERT-a thawkte chu pisa ṭan hun leh bàn hun vawng dik tura hrilhin, "Inpe taka hnathawk tur kan ni a, sorkar thurûk vawn kawngah rinawm a ngai a, conduct rules-in tih tur leh tih loh tur a sawite zawm a ngai a, discipline pawh ṭha taka kan vawn a ngai," a ti a; sorkar hnathawk tan sorkar policy dodal zawnga chêt a rem loh thu a sawi bawk.

SCERT hi kum 1980-ah Education department hnuaiah din a ni a, kum 2010-ah academic authority-ah puan a ni. Kum 2016-ah director recruitment rules thar neiin department hrana awmtir an ni a, kum 2018 atangin B.Ed zirna an kalpui a ni.