KHAWTHLIR

Thisen pe
Central Training Institute (CTI), Sesawng chuan nimin khan an hmunah blood donation camp an nei a, Aizawl Civil Hospital tan thisen unit 52 an pe a, petute mipa 49 leh hmeichhia pathum an ni. Thisen petute hi CTI-a training nei mek Excise & Narcotics mi 30, Mizoram Home Guard mi 17 leh CTI-a guardmen mi pangate an ni. Mizoram UPC, Kolasib Venglai Bial PYD pawhin nimin khan Kolasib District Hospital-ah thisen unit 17 an pe a, petute mipa pakua leh hmeichhe pariat an ni.

Excise report
Excise & Narcotics department chuan March 2019 chhung khan zu zuar 86 leh zu rûi mi 18 an man. Rakzu litre 5,498, zu siamna dawi­dim kg. 15, sap zu ûm puitling ûm 102, a chanve ûm 102 an man a, zu kaihhnawihah lirthei pali an man bawk.

Biju Festival
April 15, Thawhṭanni zan khan Rajiv Nagar-ah Chakma-te kût ngaihhlut ber Biju Festival hman a ni a, Mamit DC Dr Lalrozama'n a hmanpui. Dr Lalrozama chuan eng hnam leh sakhua pawhin hnam nun an chawi nuna an vulh len zel a ngai a, chu chu hnam hmasawnna leh changkanna a nih thu a sawi. Biju Festival-ah hian Rajiv Nagar leh a chhehvel khuaa Chakma-te an tel a ni.

Dry day puang
Excise & Narcotics Commissioner chuan nimin khan hriattirna tichhuakin, April 18 chu Kolasib district-ah dry day a nih thu leh April 19 chu Mizoram pumah dry day a nih thu a puang. Zu zawrh, hralh, lei leh in phal loh ni puan a nih chhan hi - April 18 chu Assam-ah Lok Sabha inthlanpui neih ní a nih vang leh, April 19 chu Good Friday a nih vang a ni.

Kal lo turin ngen
Silchar Mizoram House-a Deputy Resident Commissioner chuan nimin khan hriattir a tichhuak a; April 18, Ningani hian Assam state chhung district hrang hrangah Lok Sabha inthlanpui neih a nih dawn avangin, Silchar kaltlanga zin lo hram turin Mizo mipui a chah a, "Kal ngei ngei ngai tan pawh fimkhur turin kan inngenin kan inhriattir a ni," a ti.