Minister-in sorkar laipui hotute a kâwm
Minister of state Robert Romawia Royte chuan Thawhṭanni leh nimin khan Union Sports secretary RS Julanaya, DoNER secretary Inderjit Singh leh National Cadet Corps (NCC) director Lt.Gen. Rajeev Chopra te an pisa ṭheuhah a kâwm a, Mizoram hmasawnna tur hrang hrang a sawipui.
Robert Romawia Royte hian Sport Secretary hnenah hian, Mizorama SAI Complex din chungchang te, Mizoram Sports department-in project hrang hrang ministry-a a thehluh tawhte a sawipui a ni. DoNER Secratary hnenah Sports Minister chuan, DoNER budget tlem lutuk chu tihpun a ṭul thu sawiin, DoNER guidelines thar anga sport hmasawnna DoNER leh NEC-in a ti thei ta lo chu thil âwm ang lo lutuk, DoNER leh NEC din chhan kalh thei hial a nih thu a sawi.
Sports Minister chuan, DoNER ministry-in sanction dan phung a tiharsa lutuk chu dik lo a tih thu leh, rawng a bâwlsak tur India hmarchhak state-te chu a tuar mektu an nih thu a sawi bawk. Robert Romawia hian NCC Director chu Tuirial hmuna NCC training-na tihhmasawn dan tur leh NCC sum hmanga Zorama football tournament lian tham buatsaih chungchangte a sawipui a ni.