Right to Public Service Act zirho a ni

Nimin khan Kolasib leh Ma­mitah The Mizoram Right to Pub­lic Service (MRPS) Act, 2015 chung­changah inzirtirna buatsaih a ni.

MRPS Act zirhona hi Kolasib-ah chuan Kola­sib College-ah neih a ni a; khuallian, Kolasib College-a associate professor Lalnun­hlua chuan, awareness ṭha tâwk lo vangin mipuite'n an chanvo tur tam takte hi an hriat loh phah tih a sawi a, "Democracy-ah chuan mipui chanvo a pawimawh em em a, sorkar pawhin ruahmanna hrang hrang a siam ṭhinah kan chanvo bakah, khua leh tui kan nih anga kan mawhphurnate hlen chhuak turin kan inchhiar zau peih a, kan inhrilh zau zel a ngai a ni," a ti.

Inhrilhhriatna hunah hian Kolasib Sub-Hqrs. YMA, MUP, MHIP hruaitute bakah, veng hrang hrang khawtlang hruaitute leh Kolasib College zirlaite an tel a ni.

Mamitah chuan MRPS Act 2015 inzirtirna hun hi IPR conference hall-ah hman a ni a, IPRO Paul Rokima'n hmanpuiin, dan chungchang a lem nen a sawifiah.

Paul Rokima chuan dan ṭha tak tak sorkarin mipuite tana a duante chu a kawhmawhbawl zawng leh sorkar department khei zawnga hman tura duan a ni lo tih sawiin, "Kan chanvo kan humhimna tur leh kan dikna kan hailanna tur atana duan a ni," a ti a, mipuite chu he danin chanvo min pekte a taka hman a nih ngei theihna atana kan mawhphurhna hlenchhuak tura ṭan la turin a chah.

Thusawitu dang SBM am­bas­­sador Laltharzeli chuan mipuite'n kan dikna chan­vo kan humhalhna kawngah a thlenna tur dik taka thlen nachang hre loin social media etc. vela au chhuahpuiin kan lungawi mai ṭhin tih sawiin, "Hei hi thil ṭha lo tak a ni," a ti a, MRTPS Act, 2015 hnuaia dan ṭha tak chu ṭangkai taka hmang turin kalkhawm mipuite a sawm.

Sorkar thuchhuah tarlan danin, MRPS Act 2015-in a tum ber chu, sorkarin mipui hnena service a pek chhuah ṭhinte chu hun tiam chhunga a diltu hnena pek chhuah zat zat a ni. Sorkarin mipui hnena service a pek ṭhinah, ṭul loa tihkhawtlai a awm fo a, service diltute hnena danin a phût ang ni lo pawisa phût tlat an awm zauh zauh bawk. Mipui mamawh rang taka ngaihtuah zung zung thei sorkar a awm theih nan MRPS Act 2015 hi duan a ni.