Tuipuiràlah ráltlân 647 an awm In 120 awmna Thekte-ah ráltlân 119

Myanmar ram chhung buai avanga sahimna zawnga Mizorama rawn lût an pung zel a, hriat theih chinah ramri hnai khaw 18-ah ráltlân mi 647 an awm mek a, in 120 awmna Thekte khuaah ráltlân mi 119 an awm mek.

Vanglaini palai zawhna chhángin Tuipuiràl Group YMA president B Lalramenga chuan, Vaphai khawtlangin an chhinchhiah dan chuan, Tui­puiràla khaw 23 zinga khaw 18-ah Myanmar aṭanga sahimna zawnga Mizorama rawn lût mikhual 647 an awm mek a ni.

B Lalramenga sawi danin, Tuipuirala khuate'n mikhual an neih mek leh a hmaa mikhual an neih, hmun danga kal tawhte zawng zawng chu mi 905 an tling tawh a; chu'ng zinga mi 259 chu hmun dangah an kal tawh a, mi 647 an la awm mek.
Tuipuirala khua 23 zinga Khankàwn, Chawngtui, Búng­zung, Vanzau leh Leisenzo khua­te'n ráltlân mikhual an la nei lo a, khaw dang 18 chuan an nei vek tawh. Farkawnah an tam ber a, mikhualte chu an chêt reng avangin a zat a danglam deuh reng thung.

Farkawn khuaa YMA branch pathumah Myanmar aṭanga lut mikhual 429 an kawl mek a, Thekte khuaah 119, Khawbungah 25, Khuangthingah 16, Vaphaiah 13, Leithûmah 13, Vangchhiaah 11 an awm a, khaw dang 10-ah chuan 10 an tling lo.
Khuaa in awm zat aṭanga chhûta ráltlân nei tam ber Thekte khuaah chuan raltlan 119 an awm. Thekte YMA secretary Lalramdinthara chuan, ráltlân zingah thawmhnaw leh pawn­thuah keng lo an tam tih sawiin, in zawng zawngin mikhual an la thleng lo tih a sawi a, "Buhfaiah harsatna kan tâwk. Ṭanpuina kan la dawng lo a, ration buhfai hi chhungkaw pangngai tan pawha kham tâwk vel a ni," a ti.

Thekte YMA secretary Lalramdinthara chuan, ráltlânte chu chhungkua leh unaua lutte an nih thu sawiin, "In khatah mi 13 te, mi 12 te, mi pasarihte an awm a, tam deuh awm khawmte hi an inthlahrun avangin in luah turte kan zawnsak a, in cheina tur silpauline pawh kan mamawh khawp mai," a ti a; ráltlânte chu chhungte bèla kal deuh vek an nih thu te, mi in ruak luah turte an zawnsak thu leh YMA-in an siamsak ṭhin thute a sawi.

Lalramdinthara chuan, ráltlân an mikhualte chu Zángtlâng, Thântlâng, Lungding, Dâwn leh Kale khuaa mite an nih thu sawiin, "A ṭhen chu kar khatte an rawn tlanchhia a, mangkhawh a ngaih avangin hna an han thawk a, an hlau a, an lo chhuk leh ṭhin; chutiang mite chu kan chhiar tel lo. Lai unaute an ni hlawm a, ṭawng lamah harsatna a awm lo," a ti.

Mikhual nei zel dawn se an zo ang em, tih zawhna chhángin Thekte YMA Secretary chuan, "An lo kal zel a nih chuan in tinah sem zel kan tum tawh a, kan inhuam tlâng vek a, Khawkawn leh Thekpui khuate pawhin an khuaa dah turin min ti a ni," tiin a sawi.