Isua thawh lehna ni lawm a ni

Mihringte chhandam tura kraws-a Isua khenbeh a nih hnua a thawh lehna ni, Easter Sunday chu nimin khan Mizoram hmun hrang hrangah kohhrante'n hlim takin an hmang.

Easter Sunday hi Mizorama kohhran pawl hrang hrangte chuan lawmin, chawhma, chawhnu leh zanahte inkhawm an nei a; kohhran tam tak chuan zing karah Easter Sunrise Service an hmang. Salvation Army corps eng emaw zat chuan thawh lehna lawmin varṭianah tawtawrâwt an hàm a ni.

Roman Catholic kohhrante chuan Inrinni zan aṭang khan Isua thawh lehna an hmang a, Krista chu êng a ni tih lantir nan Easter Vigil Mass-ah mei thar lain bati an chhí a, tui malsawmna leh thua rawngbawlna an hman bawk.

Catholic kohhrante chuan sakhaw hunpui bikah chuan Juda-te ni chhiar dan a la chhawm a, chuvang chuan Inrinni zan khaw thim aṭangin Easter an lawm ṭan. Inrinni zana inkhawm hi Catholic kohhranah chuan inkhawm zinga urhsûn ber leh ropui ber a nih thu an sawi.