KHAWTHLIR
Inhnûkdâwk awm lo
Serchhip biala Assembly by-election neih turah, April 3, Inrinni kha nomination paper thehlut tawh, inhnûkdâwk leh duhte tana hun hnuhnung a ni a, inhnûkdâwk an awm lo.
Thisen pe
Inrinni khan KṬP, Bungkawn Bial chuan New Capital Complex Kohhran hall-ah thisen pêk an huaihawt a, Aizawl Civil Hospital tan mipa 79 leh hmeichhia 22-te'n unit 101 an pe. KṬP, Dawrpui Vengthar Branch pawhin Synod Hospital tan thisen unit 47 an pe a, petute mipa 40 leh hmeichhia pasarih an ni. ṬKP, City Church unit-in Aizawl Civil Hospital blood bank-ah unit 36 an pe a, petute mipa 30 leh hmeichhia paruk an ni a; MLD pawhin unit 11 an pe bawk. LIKBK Ṭhalai Pawl, Lawngtlai Vengpui bial chuan District Hospital tan thisen unit 19 an pe a, petute mipa 13 leh hmeichhia paruk an ni.
Silai mû man
Assam Rifles sipaite chuan April 2, 2021 khan Zokhawthar bul ramrî-ah silai mû 1,000 leh a phurhna bike (Myanmar bike) an man a, an thil mante chu Zokhawthar police hnenah an hlân.
Thei leh thlai pe
Health minister Dr R Lalthangliana chuan Good Friday leh Easter Sunday pualin March 2, Zirtawpni khan State Referral Hospital leh Durtlang BSUP CCC-a Covid-19 vei enkawl mektute tan thei leh thlai chi hrang hrang a hlàn.
Vawktê sem
Mission Foundation Movement chuan April 3, Inrinni khan Bawngkawnah chhungkaw 30 hnenah vawktê an sem. Vawktê hi Sihphir, Muthi leh Hualngohmuna chhungkaw 10 ṭheuhte hnenah pakhat ṭheuh pek a ni.
Lirthei insu-ah thi
Nimin chawhnu khan Zarkawtah taxi leh scooter an insú a, scooter khalhtu Lalremkima (43) s/o Darromani, Dawrpui chu hliamin, damdawi-in thlenpui a nih hnuah nimin chawhnu dar 2:45 khan a hliam tuar loin a thi.
Computer zirna
Central YMA hnuaia computer zirna, batch 23-na chu April 3, Inrinni chawhnu khan CYMA Hall-ah hawn a ni. Computer zirna batch 23-naah hian mi 60-in an zir dawn a, DCA first semester an zir ang. CYMA hnuaia a thlawna computer zirnaah hian mi 868-in an zir chhuak tawh a ni.
ICU-ah mi 2 awm
State Referral Hospital-ah nimin tlai dar 5 dinhmun angin Covid-19 vei mi pakua enkawl mek an ni a, an zinga pahnih chu ICU-ah awmin, mi dang zawng Isolation ward-ah an awm.
SRH-ZMC Bulletin tarlan danin, ICU-a enkawl mi pahnih zinga pakhat zawk chu ventilator hmanga enkawl a ni a, ngaihtuahawm erawh a ni lo. SRH-a awm mi pakua zingah kum 60 chung lam mi pathum an awm.