Lungsenah vawk 90 chuang thi tawh

Lunglei district-a Lungsen khuaah vawk pûl hri a léng a, nimin thleng khan vawk 90 chuang a thi tawh. Vawk pûl hri léng vang hian Lungsen mipui an mangang hle nia thu dawn a ni.

Lungsen Post editor C Lalrem­ruata hnen aṭanga thu dawn danin, vawk hri léng mek avangin tun hnaiah vawk 90 chuang a thih tawh a, nimin bikah pawh vawk thi 10 chuang an phûm a ni.

AH&Veterinary department tarlan danin, Lungsenah hian March 21, 2021-ah vawk a thi ṭan a, chumi chungchangah chuan Tlabunga Chief Veterinary Officer-in March 25-ah report a dawng. Tlabung CVO chu March 26-ah Lungsenah a kal a, vawk thisen (blood sample) lain, Rapid Antigen Test hmangin PRRS CSF leh ASF a nih leh nih loh a endik nghal.

Test result a chiang thei lo a, sample-te chu Epidemiological Centre, Aizawla endik turin a rawn thawn nghal. Epidemiological Centre-ah hian ELISA PCR test hmangin sample-te hi PRRS leh CSF a nih leh nih loh endik a ni a, ASF erawh primer an la neih loh avangin endik a ni lo.

Sample-te chu PCR hmanga endik turin College of Veterinary Science & AH, Selesihah thawn leh a ni a, April 2 khan result hriat niin, CSF, PRRS leh PCV a negative vek a ni. ASF rinhlelhawm a nih leh nih loh RT-PCR hmangin vawiin hian CVSAH-ah hian test leh a ni dawn a, chawhnu lamah result hriat theih a ni ang. Confirmatory test erawh chu National Institute of High Security Animal Diseases (NIHSAD)-ah chauh tih theih a ni.

AH&Vety department chuan, Lungsena vawk hri léng káite chu ni khat emaw chaw an ei duh lo a, an thi zui mai ṭhin tih an tarlang a; hri chu khawi aṭanga lut nge tih sawi chian a har thu tarlangin, "Bangladesh aṭanga vawk lak luh rûk vang a ni thei a, Mizoram páwn aṭanga sa rêp lak luh vang a ni thei bawk," an ti.

Thu dawn danin, tun hnaia Lungsen khuaa vawk thi tawh hlut zawng chu cheng nuai 35 chuang hû a ni tawha chhût a ni a, vawk thi tam ber chu vawkpui rái lai leh a no nei hlimte a ni. Ni khata vawk thih tam ber ní chu March 31, 2021 kha niin, vawk 13 a thi. Lungsenah hian vawk vulhtu tam zawk chuan eizawnna atan an hmang a, innghahna tak taka hmang an awm nual a ni.

Lungsen BDO leh Tlabung SDO (Civil) Lalsanglura pawhin Lungsen aṭanga vawk leh vawksa thawn chhuah leh hmun dang aṭanga vawk lak luh khapna thupek a chhuah tawh a; Tlabunga Veterinary Officer chuan Lungsen chu vawk hri lênna hmunah a puang tawh bawk.

April 3, Inrinni khan Lungsen BDO pisa conference hall-ah vawk hri léng chungchanga hriat tur pawimawh leh tih turte inhrilhfiahna hun hman a ni a; AH&Vety joint director (Southern Zone) Dr Vanlalbuanga, Lunglei DVO Dr Vanlalhruaia leh Tlabung CVO Dr K Lalhlimpuii ten thil pawimawhte an zirtir a ni.

Inrinnia inhmuh khawmnaah hian, vawk hri léng mek chu a natna hriat chian a la ni loh avang leh sample an endik tawh chinah a la negative vek avangin African Swine Fever a nih mai a rinawm thu tarlan a ni a; ASF a nih chuan vawk la dam zawng zawng pawh suat vek a ngaih tur thu tarlan a ni bawk.

AH&Vety department tarlan danin, vawiin hian Aizawl aṭangin Disease Investigation team-in Lungsen an pan dawn a, deputy director Dr M Zohmingthangi (Disease Investigation & Epidemiology)-in a ho ang. Anni hian a hmunah hri lèn dan an zir ang a, hri a darh zel loh nan ruahmanna an siampui dawn a; phai lama thawn tur tissue leh blood sample-te pawh an la dawn a ni.