Inkhàrkhip leh a ngaih loh nan fimkhur leh zual turin mipui chah

Health & Family Welfare minister Dr R Lalthangliana chuan, phai aṭanga Mizorama rawn lut zingah ni tin deuh thaw Covid-19 vei hmuh chhuah thar an awm thu sawiin, inkhàrkhip leh inkhuahkhirhna na zawk kalpui a ngaih loh nan fimkhur leh zual turin mipui a chah.

Health Minister hian April 3, Inrinni khan India rama Covid-19 hluar thar mek chungchangah thuchah a tichhuak a, "Kan mithiamte thla a muang thei rih lo," a ti a; Mizorama Covid-19 vanga thi mi 11 chhungte a tawrhpui thu a sawi.

Kum 2020 tàwp lam aṭangin Mizoram dinhmun ziaawm viau mah se, kumin March thla tìr lam aṭangin hripui vei an pun thu sawiin Minister chuan, "Tun hnaiah kan dinhmun a chhe sâwt hle. April 2 kha India ramah thla ruk chhunga ni khata hri vei hmuh tam ber ṭum niin, mi 81,466 hmuh a ni a, thi pawh ni tin mi 450 chuang an ni chho ta reng a ni," a ti.

Dr R Lalthangliana chuan, Covid-19 second wave thlentirtu variant thar chu E484Q leh L452R a nih thu sawiin, "Mithiamte chuan a hmaa Covid-19 léng ai khan 70%-in inkài chhàwn a awlsam zawk niin an hria a, ṭhalaite'n an kai nasa zawk hlea hriat a ni," a ti a; hripui léng thar leh avangin Madhya Pradesh-a district pali-ah lockdown an puan mek thu te, Maharashtra-a khawpui ṭhenkhatah zan curfew an puan thu leh Pune-ah ni sarih chhung sakhaw biakna hmunte khâr a nih thute a sawi.

Health Minister chuan, Mizoram chu Covid-19 chi thar a lo thlen pawha hmachhawn tura inbuatsaih a ngaih thu a sawi a; inkhàrkhip leh inkhuahkhirhnate khauh taka kalpui a ngaih tawh loh nan mahni theihna zâwnah nasa lehzuala ṭan la thar turin mipui a ngen.

A ṭul tàwpah lo chuan Mizoram páwna zin lo tur te, loh theih loha zin chhuakte pawh fimkhur taka khawsa tur te, Mizorama an haw dawnah Covid-19 test-ah negative result an neih pawhin fimkhur hle tur te, chhiatni ṭhatniah inkaihhruaina ngai pawimawh tur te, páwn lama intihhlimna leh mipui punkhawmna thil huaihawt lo turtein a chah bawk.

Health Minister sawi danin, sorkar laipui aṭangin Covid vaccine Covishield dose 1,23,730 Mizoramin a dawng tawh a, a dawn hnuhnun ber chu March 3, 2021 a ni. Second dose tur dahṭhat tura tih a nih avangin March thla chhunga first dose pek theih turte chhûtin district tinah sem a ni a, chumi hmang chuan kum 60 chung lam leh kum 45-59 inkar natna benvawn neite tan dose 19,297 pek tawh a ni.