Tuichang luia ṭiau lâkna kawng dang

Hnahthial Students' Joint Action Committee hnuaia Save Tuichâng Committee chuan NH-54 siam hna thawktute chu Tuichang luia ṭiau (sandstone) an lâkna kawng April 3, Inrinni khan an dang a; hna thawk mek excavator-te chu thu leh awm hma chuan thawk chhunzawm lo turin an hriattir.

Save Tuichâng Committee tarlan danin, NH-54 kawngpui zauh leh thawm ṭhat hna hi ABCI Infrastructure Ltd.-in an thawk a; kawng siamna atan Hnahthial-Tarpho kài, Thiltlang ram leh Tarpho ram chhunga ṭiaute chu phalna nei lo leh chhiah (royalty) pe loin an la ni. Tuichâng lui chhunga ṭiau an lâkna khuarah Hnahthial nula pakhat pawh May 2020 khan chesualin, a thih phah tawh tih an sawi.

ABCI thil tih dan chu duh loin Save Tuichang Committee chuan Hnahthial DC-ah an thlen a, DC chuan stay order a chhuah tawh chungin ABCI chuan permit neih tumin hma an la a ni. "Mizoram chhunga minor mineral lak phalna nei tur chuan tribal/Mizo nih a ngaih avangin ABCI hian C Lalduhawma, Aizawl Ramhlun veng hmingin permit an siam a, Hnahthial DC-ah NoC lain, lui kam leh lui chhunga ṭiaute hi cubic metre sang tam tak an la tawh a ni," an ti.

Save Tuichang Committee leh ABCI-te chuan inbiakremna neiin, lui chhunga ṭiau la lo tur leh Tuichang lui chu Hnahthial tui lâk a nih avangin dîm thei ang bera hna thawk turin an inrem a; mahse, inbiak remna chu ABCI-in an zawm loh avangin ṭiau an lâkna kalkawng chu an dang ta a ni tih an tarlang.