COVID-19: Mizoram dinhmun Ni hnih chhungin hri vei 6 hmu
Mizoramah April 2, Zirtawpni leh April 3, Inrinni khan Covid-19 vei mi pathum ve ve hmuh chhuah a ni a; Inrinni leh nimin khan hripui laka fihlim tawh mi pathum chhuahtir an ni.
Covid-19 vei April 2-a hmuh chhuah mi pathumte chu RAT hmanga hmuh chhuah vek an ni a, Inrinnia hmuh belh mi pathumte pawh RAT hmanga hmuh chhuah an ni. ZMC laboratory leh TrueNAT-PCR hmanga endik zingah hripui vei an awm lo.
Inrinni khan hripui laka fihlim tawh mi pathum chhuahtir an ni a, Durtlang BSUP CCC aṭanga chhuak pahnih leh home isolation-a awm pakhat an ni. Niminah chhuahtir an awm lo thung. Mizoramah Covid-19 vei mi 4,490 hmuh chhuah a ni tawh a, mipa 3,264 leh hmeichhia 1,226 an ni. Nimin tlai dar 5 thleng khan mi 4,439 (98.86%) chhuahtir an ni tawh a, mi 11 (0.25%) thi tawhin, enkawl mek mi 40 (0.89%) an awm.
April 2, Zirtawpni khan TrueNAT-PCR hmangin Champhai leh Hnahthialah swab sample 41 leh RAT hmangin Aizawl leh Kolasib district-ah sample 345 endik a ni a; sample endik zawng zawng chu 386 niin, chu'ng aṭanga hripui vei hmuh pathum chu 0.77% a ni. ZMC-ah hripui vei hmuh chhuah a ni lo.
Inrinni khan ZMC laboratory-ah sample 76, TrueNAT-PCR hmangin Hnahthialah sample 14 leh RAT hmangin district paliah sample 457 endik a ni a; sample endik zawng zawng chu 547 niin, chu'ng aṭanga Covid-19 vei hmuh mi pathum chu 0.55% a ni.
April 3, 2021 thlengin Mizoramah swab sample 2,54,871 endik a ni tawh a, chu'ng aṭanga Covid-19 positive hmuh tawh zat 4,490 chu 1.76% a ni. Hripui vei hmuh tawh zinga mi 2,136 chu Mizoram chhunga kái chhâwng an ni a, mi 2,354 chu Mizoram páwn aṭanga an rawn luh hnua hmuh chhuah an ni thung.
Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,664 hmuh chhuah a ni tawh a, TrueNAT-PCR hmangin 679 leh RAT hmangin 1,146 hmuh chhuah a ni tawh.
Covid-19 vei hmuh tharte
April 2-a hmuh chhuah:
Ramhlun South - 1: Hmeichhia kum 28, Delhi aṭanga haw, Lengpui Airport-a hmuh chhuah, symptom nei lo.
Kanan Veng - 1: Mipa kum 23, Ahmedabad, Gujarat aṭanga haw, Lengpui Airport-a hmuh chhuah, symptom nei.
Zemabawk (Pushpak) - 1: Hnam dang mipa kum 29, Haryana aṭanga rawn lut, Lengpui Airport-a hmuh chhuah, symptom nei lo.
April 3-a hmuh chhuah:
Lengpui Airport - 2: Mipa kum 20, Uttar Pradesh aṭanga haw, hmeichhia kum 51, Kolkata aṭanga haw; symptom nei lo ve ve.
Chaltlang - 1: Hmeichhia kum 19, March 29-a Hyderabad aṭanga haw, March 27-a RT-PCR hmanga test-ah a negative vanga Lengpui Airport-a endik loh, a hnuah symptom a neih avangin Aizawl Civil Hospital-a endiknaah hmuh chhuah a ni.