Serchhip biala inthlan tur sawifiah

April 3, Inrinni khan Serchhip DC pisaah District Election Officer's Media Centre hmalaknain Serchhip biala Assembly by-election awm tur chungchangah joint press briefing neih a ni a, district election officer leh bawrhsap Kumar Abhishek leh SP Stephen Lalrinawma ten an telpui.

Kumar Abhishek chuan, Model Code of Conduct (MCC) bawhchhiatna lian tham a la awm loa a lan thu sawiin, "Inthlan puan a nih rualin MCC viltu team te, Expenditure Monitoring Team leh Media Certification and Monitoring Committee-te'n hna an thawk nghal a, Static Surveillance Team pathumte pawhin gazette notification chhuah ní aṭangin hna an thawk ṭan leh nghal a ni," a ti a; inhnuhdawh hun tawp thlengin tluang taka an kal thu a sawi.

Polling party-te chu Covid-19 laka invènna hmanraw ṭulte pek an nih tur thu sawiin DEO chuan, "Vote thlaktu mipuite tan hand sanitizer chhawp a ni dawn a, kum 80 chung lam te, taksaa rualbanlo te, Covid-19 patient leh quarantine-a awm mekte tan postal ballot facility buatsaih a ni ang," a ti.

SP Stephen Lalrinawma chuan, dan leh thupek kenkawh kawnga police hmalak dan tlangpui a sawi a; polling station tinah police pahnih dah a ni dawn a, special drive neih mek niin, constituency chhungah checkpost siam belh a nih tur thu a sawi.