Vawk hri léng sorkarin a ngaihsak lo - Congress party, Lungsen

Lungsen khuaa Congress party ṭhalaite chuan thuchhuah siamin, tun hnaiah an khuaa vawk 90 chuang a thih tawh hnuah pawh an dinhmun chu Mizoram sorkarin a la ngaihsak lo niin an tarlang a, pawi an tih thu leh an lawm loh thu an sawi.

Lungsen Youth Block Congress Committee chuan, vawk hri léng avangin an khawtlang an buai hle tih sawiin, AV&Vety department pawhin March 21, 2021-ah case an register tawh tih an sawi a, "Vawk 70 chuang a thih hnu April 3, 2021-ah District Vety Officer (DVO)-te an lo thleng chauh a, sorkar min ngaihsak lohnaah kan lawm lo hle. Vawk 100 dáwn thih hnu leh 'infected area' atana puan kan nih hnuah, tun thlengin investigation team Lungsen an lo la thleng thei lo hi kan sorkar nêpzia tarlangtu a ni," an ti.

Lungsen khuaa vawk hri léng mek leh vawk 90 chuang thih tawhna chu ngai pawimawh turin sorkar an phût a; vawk thi neitute chu zangnadawmna pe ngei turin sorkar an phût tih an sawi bawk.