SIPMIU garbage truck AMC-in an lilám PPP mode-in bawlhhlawh paih a ni

Aizawl Municipal Corporation (AMC) chuan Aizawl khawpuia bawlhhlawh paih dan chu public private partnership (PPP)-in an kalpui leh tawh a, SIPMIU-in bawlhhlawh paihna tura motor (truck) a pekte pawh AMC chuan lilámin an tiral tawh. AMC chuan tun dinhmunah bawlhhlawh paihna tura puan (declare) hmun pakhat chiah a nei a, chu chu Tuirial lui chhakah a ni.

Vanglaini palai zawhna chhangin AMC commissioner Dr H Lalthlangliana chuan, SIPMIU-in bawlhhlawh paih motor 50 vel a pek hmanga Aizawl khawpuia bawlhhlawh paih hna kalpui chu a ṭhat tâwk loh avangin an titawp tih a sawi a, "SIPMIU-in bawlhhlawh paih motor min pekte pawh kan lilam vek tawh a, bawlhhlawh paih hi PPP mode-in, tun hmaa kan paih dan angin kan paih leh tawh a ni," a ti.

AMC Commissioner sawi danin, SIPMIU-in bawlhhlawh paih motor a lei, AMC hman tura a pekte chu a hlutna MVI an chhûttir hnuah AMC-in an lilám a ni. Lilàmna tur hian February 2019-ah hriattirna an chhuah a, kumin March thla chhungin bawlhhlawh paih motor tihral theih angte chu an tiral zo a ni. Bawlhhlawh paih motor zinga pahnih chu accident vangin an lilám tel lo a, pick-up motor-te pawh an lilám tel lo bawk.

Tuna Aizawla bawlhhlawh paih mek dan, PPP mode an kalpui dan sawiin H Lalthlangliana chuan, "Bawlhhlawh paihna senso zawng zawng aṭanga 80% chu AMC-in kan tum a, a bak 20% chu local council-te'n an tum thung. Local council tinte chuan anmahni huam chhung ṭheuhah ṭha an tih angin an kalpui," a ti.

Dr H Lalthlangliana chuan, The Mizoram Municipalities Act, 2007 Section 157-A angin, AMC-in bawlhhlawh paihna hmun a puanah chauh bawlhhlawh paih phal a nih thu a sawi a, "Tunah chuan AMC-in bawlhhlawh paihna hmun a puan chu Tuiriala dumping ground chiah hi a ni," a ti a; AMC-in bawlhhlawh paihna hmun a puan ni loa paihte chu Rs. 5,000 thleng chawitir theih a nih thu a sawi.

AMC Commissioner chuan, bawlhhlawh paihna hmun ni loa paihte chu AMC hotute hnenah hriattir theih a nih thu sawiin, "Report kan dawn a, bawlhhlawh paihna hmun ni loah an paih ngei tih finfiah a nih chuan hremna kan lek ṭhin a, pawisa chawitir pawh kan nei nual tawh a ni," a ti.

AMC-in a lilàm tâk bawlhhlawh paih motor-te hi SIPMIU-in a pek a ni a, bawlhhlawh hlân leh paihna atana remchang turin a body pawh siam a ni a, October 2, 2017-ah AMC hnenah hlan a ni. Bawlhhlawh paih motor-te chu a vaiin 54 a ni a, a lei nan SIPMIU chuan Rs. 10,70,06,290 (nuai 1070.06) an séng a ni.