KHAWTHLIR

Thisen pe
Sihphir Vengthar Bial KṬP-te chuan nimin khan Central KṬP Blood Donation Calendar angin Sihphir Vengthar Kohhran Hall-ah blood donation camp an huaihawt a, Synod Hospital tan thisen unit 42 an pe a, a petute mipa 41 leh hmeichhia pakhat an ni.

Thubuai la chinfel loh
Mizoram chhunga district & session court hrang hrangah January 30, 2019 thleng khan thubuai chinfel loh 5,080 a awm. January 1, 2019 khan court hrang hrang-ah thubuai chinfel loh 5,021 a awm a, January thla chhung khan thubuai 1,239 ziah luh niin, thubuai 686 chu chinfel a ni a, thubuai 494 chu court danga ngaihtuah tura tih a ni.

Awareness campaign
Fire Service Week 2019 pualin April 16, Thawhlehni khan Champhai Fires Station-a thawkte chuan Einstein Higher Secondary School-ah Fire Awareness Campaign an buatsaih. Fire Service Week hman a nih chhan te, kângmei laka fimkhurna tur hrang hrangte leh kângmei a chhuah palha chêt lâk dan tur hrang hrangte an zirtir a ni.

Kal lo turin ngen
Silchar Mizoram House-a Deputy Resident Commissioner chuan hriattirna a tichhuak a; April 18, Ningani hian Assam state chhung district hrang hrangah Lok Sabha inthlanpui neih a nih dawn avangin, Silchar kaltlanga zin lo turin Mizo mipui a chah a, "Kal ngei ngei ngai tan pawh fimkhur turin kan inngenin kan inhriattir a ni," a ti.

Inthlang thei lo
Nimin kha kum 2019-21 chhunga Mizo Hmeichhe Insuihkhawm Pawl (MHIP) General Headquarters office bearer tur thlan hun ni mah se, Aizawl District Court-in inthlanna buatsaih lo tura thu a pek avangin an inthlang thei lo. MHIP General Assembly hi April 16, Thawhlehni khan Vanapa Hall-ah ṭan a ni a, nimin khan chhunzawm a, kum 2019-21 chhunga OB tur thlang hun tur a ni. Inthlanna buatsaih dan turah thil dik lo awm nia hriain Court-ah zualko an awm a, Court-in a ngaihtuah hnuah MHIP-te chu inthlang rih lo turin a hriattir a ni.