Kum 2017 chhungin Mizoramah Nau piang 21,431, mitthi 6,191

Statistical Handbook, Mizoram 2018-a a lan danin, kum 2017 chhung khan Mizoram pumah nau piang 21,431 an awm a, kum hmasa 2016 aiin nau piang an tlem zawk. Kum 2017 vek khan Mizoramah mitthi 6,191 awmin, kum 2016-a thi zat aiin a tlem zawk ve bawk. Mitthite kum zat ṭhennaah, kum 2017-a thi zingah kum 70 chung lam thi an tam ber a, kum 35-44 inkarin an dawt.

Economics & Statistics department-in tun hnaia Statistical Handbook, Mizoram 2018 an tlangzarha a lan danin, kum 2017 chhunga nau piang 21,431 chu a hma kum 2016-a piang zat 22,497 aiin 1,066-in a tlem zawk. Kum 2017-a nau piang tamna ber Aizawl district-ah 8,685 an piang a, piang tlemna ber Serchhip district-ah nau 693 chiah an piang. Serchhip district-a nau piang zat hi kum 2017 leh 2016-ah sang khat an tling lo ve ve a, Mizoram district pariat zinga nau piang 1,000 tlin lohna district awm chhun a ni.

Mizoram pumah kum 2016 aiin kum 2017-ah nau piang an tlem zawk laiin, Kolasib district, Lunglei district leh Siaha district-ahte chuan kum 2016 aiin 2017-ah nau piang an tam zawk a; a bak district pangaah chuan kum 2016-ah nau piang an tam zawk a ni.

Statistical Handbook, Mizoram 2018-a a lan danin, kum 2017 khan Mizoram pumah mitthi 6,191 an awm a, kum 2016 chhunga mitthi zat 6,422 aiin 231-in a tlem zawk. Kum 2017-a thite chu mipa 4,020 leh hmeichhia 2,171 an ni a, mipa thi zat hi hmeichhe thi zat let khat a tling ṭêp a ni.

Aizawl district chu mitthi tamna ber district niin, kum 2017-ah mi 2,960 leh kum 2016-ah mi 3,240 an thi a; Siaha district chu mitthi tlemna ber district an ni a, kum 2017-ah mi 276 leh kum 2016-ah mi 196 an thi a ni.

Statistical Handbook-ah hian mitthi kum zat chu hlawm 10-ah ṭhen a ni a; kum an ṭhenna ang chuan, kum 70 chung lam thi tam berin, 1,784 an thi a, chu chu mitthi zawng zawng 6,191 aṭangin 35.88% a tling. A dawttu chu ṭhalai kum rual la tih theih, kum 35-44 inkar an ni a, he kum inkara thi zat chu mi 869 niin, chu chu mitthi zawng zawng aṭangin 17.38% a tling a; mipa 673 leh hmeichhia 196 an ni.

Kohhran ṭhalai pawla la tel rual kum leh a hnaivai kum angah, hmeichhia aiin mipa thi an tam zawk hle a; kum 15-44 inkar bikah kum 2017 khan mi 1,747 an thi a, chung zinga 1,325 chu mipa niin, mi 422 chu hmeichhia an ni. Kum 15-33 inkar bikah hian, mipa thi zat 1,325 hi thi zawng zawng 1,747 aṭangin 75.84% a ni a, hmeichhe thi zat 4232 chu 24.16% chiah a ni thung.