Election Returning Officer lakah MPCC & ZPM an lungawi lo

Lok Sabha inthlana thawkho Mizoram Pradesh Congress Committee (MPCC) leh Zoram Peoples' Movement (ZPM) Joint Committee member-te chuan nimin khan Congress Bhavan-ah emergency meeting an nei a; inthlana returning officer Vanlalngaihsaka, Aizawl DEO/DC lakah complaint thehluh an tum thu an puang.

MPCC & ZPM Publicity Commitee tarlan danin, Lung­lei district-a polling station ṭhenkhata MP election candidate-te serial no. 4 leh 5 thlakthleng a nih chungchanga complaint thehluhah, tun thleng­a R.O-in hmalakna a la nei lo chu lungawi thlak loh an ti a; chuvang chuan, Chief Electoral Officer hnenah complaint theh­luh an tum a ni.

MPCC & ZPM chuan, "Mipui candidate Pu Lal­nghinglova Hmar laka Returning Officer-in show cause notice an pek chungchangah, Pu Lal­nghinglova Hmar-in show cause notice lehkha a hmuh hma darkar hnih hma lamah social media-a tihdarh a ni hi thil dik lo tak a nih avangin, hemia mawhphurtu nia rin Returning Officer laka action lak a nih ngei theih nan CEO hnenah complaint kan thehlut bawk dawn a ni," an ti.

Pawl pahnih hruaitute hnen aṭanga thu dawn danin, MPCC leh ZPM-te hian MP election Returning Officer lakah hian vawiinah complaint an thehlut dawn a ni.