YMA Central Coordination Committee an ṭhu
Young Mizo Association (YMA)-a rorelna sang ber dawttu Central Coordination Committee (CCC) chu nimin khan Central YMA Hall-ah an ṭhu khawm. Meeting hi CYMA president Vanlalruata'n kaihruaiin, CYMA general secretary Lalhmachhuana'n report pe a; YMA inkhawmpui thurel bawhzui dante a sawifiah.
YMA CCC meeting-ah hian member an kal ṭha thawkhat a; member-te chu - CYMA office bearer leh CEC member te, YMA sub-headquarters aiawh mi paruk, group aiawh mi pahnih leh Aizawl khawpui chhung branch aiawh mi pakhat an ni.
YMA thurel bawhzui dan GS report
1 'Mizorama kohhran hrang hrangte nen ram leh hnam humhalhna kawngah thawhhona leh inpumkhatna ṭha zawk kan neih theih nan Central YMA-in hma la rawh se' tih bawhzuiin, Mizoram Kohhran Hruaitu Committee (MKHC)-te nen zau zawka sawiho ṭhain kan hria a, MKHC hotute hman remchan hun ngaihchan mek a ni.
2. 'Thingtlang lama zirna a ṭhat zawk theih nan CYMA-in hmalak ni rawh se' tih chu CYMA Education Sub-Committee-te'n theihtawp chhuahin an buaipui a, CYMA leh Education department-te thawhhona thuthlung siam turin Education Minister-ah thlen a ni. Zirnain hma a sawn theih nan Education Minister sawipui a ni. Quaitionare-te siamin branch tinah thawn chhuah tura ruahman a ni bawk.
3. 'Mizo ṭawng humhalh kawngah CYMA-in hma la rawh se' tih chu branch tinah a theih hrâm chuan Mizo ṭawng hmang uar hram hram tura hriattirna thawn chhuah tura hmalak a ni. Language Board din a nih theih nan sorkarah thlen tura hmalak mek a ni bawk.
4. 'Zu leh ruihhlo do kawngah tun aia nasa leh chak zawka branch tinte'n hma kan lak theih nan CYMA-in hma la rawh se' tih chu bawhzuiin, kan awmna theiha theihtawp chhuaha hma lo la chhunzawm zel turin branch zawng zawngah lehkha thawn chhuah tura ruahman a ni.
5. 'Sorkar aṭanga development fund hna thawhte a ṭha thei ang bera thawh a nih theih nan CYMA-in hma la rawh se' tih chu, kan awmna area ṭheuha ṭan lo la thar ṭheuh tura infuih ni se.
6. 'Mipuite'n ration buhfai leh gas bûk dik leh tlinga kan lak theih nan CYMA-in chak leh rualkhai zawkin hma la rawh se' tih chungchangah Supply Minister hmuh a ni a, sawipui a ni.
7. 'Mizo hmeichhiate'n hnam dang pasal (tribal-in non tribal) an neihin, Schedule Tribe status hlihsakna tur 'Social Custom Bill' Mizoram Legislative Assembly-a pass a nih theih nan CYMA-in hma la rawh se' tih chu Chief Minister sawipui a ni a, lehkha thehluh nghal a ni. CM pawhin theihtawp chhuaha hma min lakpui a tum thu a sawi.
8. 'National Register of Citizens (NRC) hi Mizoramah kalpui ve ni rawh se' tih chu bawhzuiin Study Group din a ni a, hengte hi chairman - general secretary Lalhmachhuana, member - CEC pahnih Lalrammuana, Jeffrey L Fanai leh Vanlalfela an ni a. Study Group-te hian CEC meeting-ah report an thehlut tawh a, a ṭul anga bawhzui zel a ni.
9. 'Champhai aṭanga Tahan (Myanmar) bus service tir turin sorkarin hma la rawh se' tih chu a ṭul anga bawhzui zel a ni.