Lungsenah vawk 108 a thi tawh African Swine Fever an ringhlel

Lunglei district chhung, Lungsen khuaah March 21, 2021 aṭanga nimin chhun dar 1 thleng khan vawk 108 a thi tawh. Animal Husbandry & Veterinary minister Dr K Beichhua chuan, vawk thih chhanah African Swine Fever (ASF) rinhlelh a nih thu a sawi.

Dr K Beichhua hian nimin khan a chenna inah thuthar thehdarhtute a kâwm a, "Sorkarna kan chan hnuah sa leh artuia intodelh loh lutuk tihziawmna atan hma kan la a, hri laka kan himna atan hmun dang aṭanga vawk lak luh khap char char a ni. Pathian zarah hun eng emaw chen hri léng kan tuar lo a, mahse, kan hlauhthawn em em chu a rawn lut ta niin a lang," a ti.

Lungsenah kumin March 21-ah vawk a thi ṭan a, March 25-ah AH&Vety department-in report a dawn thu sawiin K Beichhua chuan, "Tlabung CVO hoin Lungsen an pan nghal a, PRRS leh Classical Swine Fever a ni lo tih finfiah a ni tawh. ASF a ni ngei chuan kan hria a, mahse, hetah test theih pawh ni se, NIHSAD, Bhopal-ah finfiah a, anni'n an puan a ngai," a ti a; NIHSAD-ah hian sample test a nih dawn thu a sawi.

AH & Vety Minister chuan, vawk hri léng Mizoramah a luh lohna turin theihtawp an chhuah tih sawiin, "Hriat phâk loh leh rin phâk loh aṭanga lut a awm ṭhin a nih hmel. Bangladesh lam aṭanga a rûka vawk lâk luh hmanga darh a nih kan ring deuh a, Meghalaya aṭanga vawk sa leh vawk sa aṭanga thil siam lâk luh aṭanga kái pawh a ni thei," a ti.

Nimin (Thawhṭanni) khan doctor panga telna Investigation Team tirh an nih thu sawiin Dr K Beichhua chuan, "Kei pawh April 8 hian a hmun ngeia kal ka tum. Lungsenah hian ran khuahkhirhna puan a ni tawh. ASF hi a hlauhawm em em a, inkái a awlsam bakah a kai tawh chu an thi ngei ngei a ni," a ti a; Lunglei district bakah, district dangte pawh fimkhur tura an duh thu a sawi.

AH & Vety Minister chuan, hri léng chu department chauh do hneh chi a ni lo tih sawiin, "ASF a nih chuan a damdawi a awm lo. Invèn hi kan tih theih awmchhun a ni. Hri do tur hian thawhhona ṭha tak kan neih a ngai tak zet," a ti.

Zawhna chhángin Dr K Beichhua chuan, Lungsena vawk thih dan anga vawk thihna report hmun dang aṭangin an la dawng lo tih a sawi a, "Vawk thi neitute zángnadawmna pek chungchang chu sorkar hotute nena ngaihtuah ngai chi a ni. ASF a nih chuan engtiangin nge min nghawng nat dawn hriat phâk a ni lo," a ti a; AH&Vety department chuan theihtawp an chhuah zel dawn thu a sawi a ni.