Lirthei tlâk dâlna siam turin MLA-in Chief Minister a ngen

Lawngtlai West bialtu MLA C Ngunlianchunga chuan nimin khan PWD chang­tu chief minister Zoram­thanga a pisaah a kâwm a; Chàmring leh Sialsûk inkara lirthei chetsual tamna hmun, 'Vai-áwt' an tih maiah lirthei tlân liam tur danna siam turin a ngen.

C Ngunlianchunga hian Chief Minister hnenah ngenna lehkha a pe a; lehkhaah chuan, Vai-áwt hmun chu DMR minister a nih laiin cheng nuai 30 chuang séngin an siam thu tarlangin, "Hun eng emaw chen chu motor tlân liam pawh a awm tawh loh avangin thinlung takin kan lawm hle. Amaherawhchu, vanduaithlak takin tunlai hian motor pathum a tlân liam leh a ni. Kawng thlang lamah RCC ban phun a, motor tlân liam tur danna siam a ngai hle," a ti.

Department anga hmalak a harsat dawn chuan a mimal sum hmang pawha motor tlân liam tur danna siam ṭha a tih thu sawiin C Ngunlianchunga chuan, "Department aṭangin harsatna a awm a, siam theih a nih dawn loh chuan khawngaih takin thla khat chhung ka lo ngaichâng ang a, min hrilh thei la ka lawm hle ang," a ti a; department lam aṭanga remchan lohna a awm chuan thla khat ral hnuah a mimal suma hma a lak tur thu a tarlang bawk.