COVID-19: Mizoram dinhmun Niminah mi 5 chhuahtir an ni

April 4, Pathianni khan Mizoramah Covid-19 vei pakhat hmuh chhuah a ni a, natna (symptom) lang a ni. Nimin khan hripui laka fihlim tawh mi panga chu Durtlang BSUP CCC aṭangin chhuahtir an ni thung.

Covid-19 vei hmuh thar chu RAT hmangin Aizawla private hospital-a hmuh chhuah a ni a, Ramhlun North-a hmeichhia kum 42 mi a ni. Tualchhunga kái leh symptom nei a ni a, a kàina hriat a ni lo. ZMC laboratory-ah swab sample endik a ni lo a, TrueNAT-PCR hmanga endik zingah hripui vei an awm lo.

Mizoramah Covid-19 vei mi 4,491 hmuh chhuah a ni tawh a, mipa 3,264 leh hmeichhia 1,227 an ni. Nimin tlai dar 5 thleng khan mi 4,444 (98.95%) chhuahtir an ni tawh a, mi 11 (0.25%) thi tawhin, enkawl mek mi 36 (0.80%) an awm.
Pathianni khan TrueNAT-PCR hmangin Hnahthialah swab sample pali leh RAT hmangin district pangaah sample 422 endik a ni a; sample endik zawng zawng chu 426 niin, chu'ng aṭanga hripui vei hmuh pakhat chu 0.23% a ni.

April 4, 2021 thlengin Mizoramah swab sample 2,55,297 endik a ni tawh a, chu'ng aṭanga Covid-19 positive hmuh tawh zat 4,491 chu 1.76% a ni. Hripui vei hmuh tawh zinga mi 2,137 chu Mizoram chhunga kái chhâwng an ni a, mi 2,354 chu Mizoram páwn aṭanga an rawn luh hnua hmuh chhuah an ni thung.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,664 hmuh chhuah a ni tawh a, TrueNAT-PCR hmangin 679 leh RAT hmangin 1,147 hmuh chhuah a ni tawh.