YMA-in ruihhlo an mante an hâl Sorkar duhkhawp loh vangin YMA a che

Central YMA chuan ruihhlo an man tawhte chu nimin zing khan CYMA pisa tualah an hâl. CYMA president Vanlalruata chuan, ruihhlo do kawngah sorkar chêt dan an duhkhawp loh avangin YMA-in hma an la leh tih a sawi.

Nimin zinga ruihhlo hâl tâkte chu ruihhlo chi hrang hrang a ni a, tualchhunga hralhna ang chuan cheng nuai 22 chuang man a ni.

Ruihhlo hâlna inkhawm hi CYMA vice president Lalhmachhuana'n a kaihruai a; CYMA President chuan, kum 2019-a North Vanlaiphaia YMA General Conference-ah kumpuan atan 'Zirna uar' an thlan thu sawiin, "Chuvangin ruihhlo do chu chawlhsan rihin, sorkar lam rinráwlah neih a ni. Amaherawhchu, ruihhlo avanga ṭhalai tam tak tun hnaiah an thih leh tâk avangin YMA CEC chuan ni thei ngangin a hre lo a, kan ram dinhmun zir chiangin, ruihhlo do a rêl ta a ni ber," a ti.

Central YMA chuan ruihhlo do kawnga sorkar chêt dan an duhkhawp loh avanga hma la leh an nih ber thu sawiin Vanlalruata chuan, "Ruihhlo zuartute an zalên tawh hle. Ruihhlo do hi a huphurhawm a, senso a hautak a, hun leh thâ a hek hle. Mahse, keini tal kan pên chhuah loh chuan tiin hma kan la leh a ni," a ti a; Police (Narcotics) leh Excise & Narcotics department-te chu ruihhlo doin nasa leh zuala thawk chhuak tura an beisei tlat thu a sawi.

CYMA President chuan, YMA kumpuan atana 'Ruihhlo do' hman ṭan kum 2004-ah ruihhlo avangin mi 143 an thih thu sawiin, "YMA-in ruihhlo do a puan phat aṭangin ruihhlo vanga ṭhalai thi nasa takin a tlahniam nghal a ni. Amaherawhchu, kum 2020 khan ruihhlo vanga thi chu mi 67 an tling chho leh a, kum 16 chhunga ruihhlo avanga thi tam ber kum a ni ta hial. Kuminah ruihhlo avangin mi 15 an thi leh tawh. Chuvangin, YMA chuan ngai ngam loin ruihhlo do turin a pên chhuak a ni," a ti.

Central YMA chuan ruihhlo do kawngah YMA sub-headquarters, group leh branch-te chu chak lehzuala hma la turin a beisei a ni.