KHAWTHLIR

DEO leh MPF
Serchhip district election officer Kumar Abhishek, bawrhsap chuan nimin khan DC pisa meeting hall-ah Mizoram People’s Forum (MPF) Serchhip district forum hruaitute a kawm a, Assembly by-election neih tur a sawipui. DEO chuan, MPF local forum tinte chu vote thlak nía an inenkawl nan Rs. 500 ṭheuh pek an nih tur thu a sawi. Inkawmnaah hian general observer Lokesh Kumar pawh a tel a ni.

Pisa kái tan
Adviser to chief minister (Technical) K Lalsawmvela chuan nimin khan Chief Minister's Office-ah a pisa a kái ṭan. Pisa luah ṭan puala inkhawm buatsaihah chief minister Zoramthanga chuan, K Lalsawmvela chu Mizoram tan a thiamnate ṭangkai taka hmang turin a chah a ni.

Ragging sawiho
Nimin khan BN College of Nursing huaihawtin an college-ah zirna-ina zirlai awm hmasa zawkte'n zirlai thar leh naupang zawkte chunga hlei an lenna thleng ṭhin (ragging) chungchang sawiho a ni. Training hi BN College of Nursing principal Prof. Kapzawni'n a kaihruai a, CEO Joseph Lalhmingthanga'n ragging awmzia a sawifiah a ni.

ICU-ah mi 2 awm
State Referral Hospital-ah nimin tlai dar 5 dinhmun angin Covid-19 vei mi pakua enkawl mek an ni a, an zinga pahnih chu ICU-ah awmin, mi dang zawng Isolation ward-ah an awm. SRH-ZMC Bulletin tarlan danin, ICU-a enkawl mi pahnih zinga pakhat zawk chu ventilator hmanga enkawl a ni a, ngaihtuahawm erawh a ni lo. SRH-a awm mi pakua zingah kum 60 chung lam mi pathum an awm.

Lawmman sem
Keifang khuain kum 100 (centenary) a tlin puala hla phuah leh logo siam intihsiakna an buatsaiha ti thate hnenah nimin khan VFDC Hall-ah lawmman sem a ni a, Saitual DC VL Hruaizela'n a hmanpui. Hla phuahah Lalrotluanga, Keifang pakhatna a ni a, logo siamah Lalhmingthanga, Keifang pakhatna a ni.