Lunglei district-a VC ṭha ber atan Bazar Veng leh Zotlang thlan a ni

Lungleia Local Administration department (LAD) chuan nimin khan DC conference hall-ah an district-a tualchhung rorelna leh hmasawnna langtlang taka (Promotion of Transparency in Local Administration, Phase-II, 2021) thawk ṭha VC-te hnenah lawmman an hlan a, DC Kulothungan A-in a hmanpui. Bazar Veng leh Zotlang Veng VC-te chu VC thawk ṭha berah an thlang.

Promotion of Transparency in Local Administration-in a tum ber chu, VC leh mipui inkara thawhhona ṭha leh inrin tawnna a awm theih nana hmalak a ni a; hmasawnna hnathawhte langtlang taka thawh leh hmuh theiha a awm theih nana tih a ni. VC ṭha hi Phase-I, 2020-ah VC panga thlan a ni tawh a, Phase-II ah VC 10 thlan leh a ni.

Promotion of Transparency in Local Administration Phase-II 2021-ah hian pakhatna chu Bazar Veng leh Zotlang an ni a, Venghlun chu pahnihna niin, Theiriat leh Zohnuai chu pathumna an ni. Sethlun, Mualṭhuam North leh he hmalaknaa LAD-in a thawhpui Lunglei College NSS-te hnenah special prize pek a ni bawk.

Tehfunga an hmante chu - thla khatah vawi khat tal kokim taka VC ṭhutkhawm te, VC member zawng zawng hriata sum hmuhna leh hmanna tarlan te, thla khatah vawi khat tal vantlang inkhawm (gram sabha) neiha sum dinhmun mipui hriata puanzar te, VC house-ah a duh apiang en theih tura sum dinhmun tarlan leh khua/veng chanchinbua VC thuthlukna leh sum dinhmun puanzar te, zawhfiah duh leh sawisel duh nei tan complaint channel/phone number tarlan te, VC hnathawh enpui tura tlawmngai pawl leh kohhrante sâwm te, thla tin LAD office aṭanga internal audit neihte a ni.