ZPM-ah dictator taka rorelna a leng lo - ZPM Consultant

ZPM consultant F Rodingliana chuan, ZPM-ah party president ta neih tlat leh dictator taka rorelna a len ve loh thu a sawi.

Nimina ZPM pisaa inkhawma thusawitu F Rodingliana chuan, "ZPM-ah chuan party President ka ta emaw tia vawn tlat leh democracy ramah dictator taka rorelte hi kan danah a leng ve lo a, party president leh chief minister hi term hnih bak a chelh zàwn theih loh avangin ZPM-ah hian ṭhalaite tan hmun a awm a ni. ZPM hi mimal duh dana a kal ve loh avang leh committee rorela kan kal avangin party dangte hian an hrethiam ve thei lo," a ti.

ZPM Consultant chuan, "Party leh mimal hamṭhat nan zak miah loin mipui sum an hmang a, party hamṭhat nan tiam chikimin an intiam mai bakah, khawtlang rorel buai khawpin sum an chelek tih thâwmte kan hria a ni," a ti a; ZPM chuan an kalphung an la thlâk lo a, Pathian ram tun din ṭulna avangin ṭanhmun an siam rem ṭhin tih a sawi.

F Rodingliana chuan, tun hnaiah Serchhip bialah by-election a awm dawn tih sawiin, "Kan minister leh board chairman-te'n Government of Mizoram tih inziak motor-a chuang vûng chunga 'Kan party in vote loh chuan...' tia mipui min la vau kûk kûk mai hi chu a zahthlak mai a ni lo, a vanduaithlak hle; mipui ta an nihna hi an bo ngawih ngawih a, ringtu nihna nen pawh a inhmeh lo hle a ni," a ti.