Vawk hri chungchangah hriattirna chhuah

Lunglei district veterinary officer (DVO) Dr Vanlalbuanga chuan nimin khan thuchhuah siamin, tunlaia Lungsen khuaa vawk hri léng mek chungchanga mipui zawm tur a tarlang a; vawk vulh lai, chhan leh vàng hriat tur awm loa thite chu phúm nghal mai loin, bialtu field Staff-te hriattir hmasa turin a hriattir.

DVO chuan, district dang leh khaw dang aṭanga vawk lak luh khapna thupek chhuah tawh chu zâwm turin Lunglei district mipui a chah a, "Vawk notê leh a talh tur chi, sumdawnna atana kalpui a, dan pawisa loa a rûka khaw dang leh district páwn aṭanga la lut a, mipui leh vawk vulh duhtute buma hralh chíng an awm tih hriat a ni," a ti a; dan bawhchhiate chu hrem theih an nih thu a tarlang.

Lunglei DVO hriattirna
1. Vawk-inte páwn lam mi tlawhtir loh tur, ṭhenawma ran damlo tlawhpawh loh tur.
2. Vawk damlo rêng rêng dah hranna bik siam a, a damloh chhung chu dah hran tur a ni.
3. Vawk-in leh a vêl te, chaw pekna leh hmanrua dangte bleaching powder (2-3%) leh chinai tui (1%) hmangin tihthianghlim fo tur.
4. Vawk vulh lai, chhan leh vang hmuh tur awm loa thi thut a awmin, phûm bo nghal mai loin, bialtu field staff hriattir vat tur.
5. Vawk thite chu ft. 3-a thûkah chinai nen phûm tur a ni.
6. Ran damlo chaw pekna hmanruate chu a dam ṭhate chaw pek nan hman pawlh loh tur.
7. Ran enkawltuin thawmhnaw hâk bik leh gum boot tihfai awlsam bun bik neih tur a ni.
8. Páwn lam chaw ningnawi pek loh a him ber a, kan pe a nih pawhin uluk taka chhuan so tur.
9. Vawk talhna leh puahna ningnawite felfai taka phùm tur a ni.