World Bank sum hmuhah MNF an lawm

MNF party chuan thuchhuah siamin, MNF kaihhruai sorkarin cheng nuai 28,000 hû project, Mizoram tan World Bank aṭanga an hmu chu lawmawm an tih thu leh hma latute fakawm an tih thu an tarlang.

MNF chuan, Mizoram Health Systems Strengthening Project (MHSSP) atan World Bank aṭanga sum hmuh a nih theih nan Health minister Dr R Lalthangliana'n kum 2019-ah USA-a World Bank hmunpuiah leh India rama World Bank office-ah hma a lak thu an tarlang a, "A tirah a hlawhtlinna kan hmuh mai lohna chhan hi Covid-19 vanga khawvel pum kan buai vang a ni a, tun hnaia a hlawhtlinna kan hmu thei ta hi Health Minister kan chhuang tak zet a ni," an ti.

World Bank aṭanga sum hmuh a nih theihna turin chief minister Zoramthanga leh Health minister Dr R Lalthangliana ten ruahmanna an thlir lâwk dun hmasa nia sawiin MNF chuan, "Chief Minister remtihna nen thlapin Health Minister hian hmalakna a kalpui a, Mizoram sorkarin a do lêtna tur, a tum ve tur pawh inhawng taka ngaihtuahna fing tak Chief Minister-in a hmang hi lawmawm kan ti hle a ni," an ti a; Chief Minister leh Health Minister fakawm an tih thu an sawi.