Model Code of Conduct zawhah Zu zawrh tihtâwp a ni ang - K Beichhua

Excise & Narcotics minister Dr K Beichhua chuan, High Court thu anga zu zawrh chu Election Model Code of Conduct zawh rualin, May 27, 2019 aṭangin notification tichhuaka tihtawp a nih dawn thu a sawi.

Dr K Beichhua hian April 18, Ningani khan zu dahkhawlna RTP Bonded Warehouse leh Rafael Bonded Warehouse-te a tlawh a; thuthar thehdarhtute hmaah, sorkarin zu zawrh tihtawp chu ngaih pawimawh hmasa berah a neih thu sawiin, "Zu zawrh titawp tura kan intiamna tihlawhtling turin hma kan la nghal a ni. March-a budget session-ah zu zawrh titawpna tur dan pawh pass a ni," a ti.

Excise & Narcotics Minister chuan, zu zawrh tihtawpna tur bill pass a nih hnuah zu zawrh titawp tura hma an lak thu sawiin, "Mahse, inthlan puan a ni a, Model Code of Conduct hman a ni a, zu zuartute an zualko avangin Election Commission thu angin zu zawrhtir leh a ni," a ti a; March 31, 2019-a zu zawrh phalna licence tawp erawh sorkarin a renew duh loh thu a sawi.

Warehouse neitute High Court-ah an zualko avangin Court thu angin May 27, 2019 thleng zu zawrh a nih leh dawn thu sawiin Dr K Beichhua chuan, "Sorkar tan pawh Court thu chu hnial rual a ni lo. Kan intiam ang ngeiin zu zawrh hi tihtawp a ni dawn a, May 27-a zawh hunah notification chhuahin zu zawrh hi tihtawp a ni dawn tih Zoram mipuite ka hriattir duh a ni," a ti.

Bonded warehouse pathumaah zu lak khawm sa eng emaw zat a la awm a, RTP Bonded Warehouse-ah zu case 1,227 leh beer case 2,909, a vaiin case 4,136 awmin cheng nuai 78.17 hû a ni. SS Bonded Warehouse-ah zu case 4,407 leh beer case 543, a vaiin case 4,950 a awm a, cheng nuai 112.87 hu a ni a; Rafael Bonded Warehouse-ah zu case 30,871 leh beer case 4,410, a vaiin case 35,281 awmin, cheng nuai 1,426.95 hû a ni.

Tun dinhmunah Mizoram chhungah phalna neia zu zuar (wine vendor) 25 an awm mek a, High Court thupek anga zu an zawrh theih hun chu May 27, 2019-ah a tawp ang.