MP Election RO lakah lungawi loin CEO hnenah complaint thehluh a ni

Mizoram Pradesh Congress Committee (MPCC) leh Zoram Peoples' Movement (ZPM)-te chuan Lok Sabha inthlana an candidate Lalnghinglova Hmar election agent Lalhnehzauva hmingin April 18, Ningani khan Chief Electoral Officer (CEO) hnenah lungawi lohna (complaint) an thehlut a; MP election Returning Officer thil tih dan chu Supreme Court ruling bawhchhiatna a nih thu an ziak.

Complaint thehluhah hian, Lok Sabha inthlana candidate-te hming ziah tlara serial no. 4 leh 5 tihsual chungchang leh chumi vanga complaint thehluh tawh chungchang te, Lalnghinglova Hmar hnena show cause notice pek chungchanga lungawi lohnate ziah lan a ni.

Complaint thehluttu chuan, Lunglei district-a polling station hrang hranga MP candidate-te serial number tihsual chu Joint CEO leh Lunglei DEO ten an pawm tih a sawi a; April 11-ah complaint thehluh nghal a nih laiin, tun thlenga CEO aṭanga hmalakna a la awm lo chu lungawi thlak loh an tih thu a sawi.

Vanglaini chanchinbuin party symbol a tihsual vanga MPCC leh ZPM thlàwp mipui candidate Lalnghinglova Hmar insawifiah tura show cause notice pek a nihnaah, Lalnghinglova a insawifiah hma leh insawifiahna hun a tawp hmaa MP election returning officer Vanlalngaihsaka, Aizawl DC-in Aizawl Police Station-a FIR a thehlut chu Supreme Court ruling bawhchhiatna a nih thu a tarlang.

Complaint thehluttu chuan, Supreme Court-in March 11, 2013-a ruling a siamah chuan, 'Newspaper report-ah thubuai (civil emaw, criminal emaw) a awm chuan, newspaper editor chu mawhphurtu a ni,' tih a nih thu a tarlang a, "Press and Registration of Books Act angin, newspaper-ah editor leh publisher chu engkima mawhphurtu a ni a, Vanglaini-in April 11, 2019-a party symbol an tihsualah pawh hian joint editor Lalnghinglova hian mawh a phur thei lo a ni," a ti.

Lehkhaa tarlan danin, Lalnghinglova Hmar chu show cause notice a hmuh aṭanga darkar nga chhunga insawifiah tura tih a ni a; Lalnghinglova Hmar chuan chawhnu dar 2:15-ah show cause notice lehkha a hmuh angin, zan dar 7:15 thleng insawifiahna hun a nei a ni. Insawifiahna hun a tawp hma leh insawifiahna a thehluh hma, tlai dar 3:15-ah RO Vanlalngaihsaka chuan police-ah FIR a thehlut a ni.

Lalnghinglova Hmar-in chawhnu dar 2:15-a show cause notice a dawn hmain show cause notice copy chu social media-ah chawhnu dar 1 velah a darh chu lung­awi thlak loh an tih thu leh Lalnghinglova Hmar tan a ṭhat loh hle thu an tarlang.
Hemi chungchangah hian Joint CEO H Lianzela chuan, RO hnenah vote thlak zawh hma chu show cause notice emaw, eng thil pawh Lalnghinglova Hmar chungchangah hmalakna lo nei hrih lo tura an hriattir ngei thu Lalnghinglova election agent Lalhnehzauva hnenah a sawi a, a sawi lai chu ZPM leh MPCC hruaitute bakah, journalist-te pawhin an hriat thu an tarlang a ni.

Complaint lehkha chu CEO Ashish Kundra a awm loh avangin a aiawhin Joint CEO H Lianzela'n a dawng a; election general observer-te hnenah a copy an thawn bawk.