Urhsûn takin Good Friday hman a ni

Nimin kha Kristiante ni pawimawh, Isua Krista kraws-a khenbehna ní, Good Friday a ni a, khawvel pumah Kristiante'n urhsûn takin an hmang. Mizorama kohhran tam zawk chuan Good Friday programme hi Ningani zan (Maundy Thursday) aṭangin an hmang ṭan a ni.

Roman Catholic kohhrante chuan Good Friday pual hian Tûmkau Ni aṭangin hapta thianghlim (holy week) an hmang ṭan tawh a; Ningani zan kha zanriah hnuhnung a nih angin, 'Ke sil zan' an hmang a, bishop leh puithiamte'n kohhran mite ke an silsak. Ke insilsak hi Isua'n hmangaihna leh inngaihtlawmna a zirtir entirna a ni.

Catholic kohhrana parish tin chuan nimin khan 'Kraws Kawngzawh' an nei a, hei hi Isua'n Kalvari tlang pana kraws a putna leh a kawng zawh hriatrengna a ni. Kawngzawhna aṭangin biak-inah an lut a, inkhawm ursun takin an hmang zui a ni. Catholic kohhrante hian Good Friday-ah hian chaw an nghei ṭhin bawk.

Presbyterian Kohhran chuan urhsûn takin an hmang a, Mizoram Synod aṭanga thupui thlan hmangin Pathian thuchah an ngaithla. Ningani zan khan tualchhung kohhran hrang hrangin Lalpa Zanriah Sakramen an kîlho a, thupui chu 'Mi vênpui rawh u' tih a ni.

Nimin chawhmah inkhawmah thupui chu 'Isua an hnâwl' tih a ni a; chawhnu inkhawmah ''Ka pa, anni hi ngaidam rawh' tih leh, zan inkhawmah 'Kraws - Inremna' tihte a ni.

Baptist Church of Mizoram kohhrante pawhin Good Friday hi BCM aṭanga thupui thlan hmangin an hmang a, Ningani zan khan Lalpa Zanriah Sakramen an kilho hlawm. Kohhran pawl dangte pawhin urhsun takin an hmang bawk. Good Friday-ah hian tualchhung kohhran ṭhenkhat chuan thingpui ruai an ṭheh a ni.

Kristiante hun/ni pawimawh, Tumkau Ni, Good Friday leh Easter Sunday-te hi ni bik nei a ni lo a, kum tin a danglam ṭhin. Isua thih hun lai kha Judate Kalhlen Kût hman lai vel, Nisan ni 14 vel a ni a, chu chu March 20 leh April 25 inkar, thla fang bial lai a ni. Chuvang chuan, tun thlengin Good Friday hi March 20 leh April 25 inkara thla fang bial lai Zirtawpni-ah hman ṭhin a ni ta a; Good Friday hma Pathianni chu Tumkau Ni niin, Good Friday zawh Pathianni chu Easter Sunday a ni. Easter Sunday aṭanga ni 50-na chu Pentikos Ni a ni leh bawk.