KHAWTHLIR
Thisen pe
UPC (NEI) hnuaia Penticostal Youth Department (PYD), Pukpui local chuan Good Friday pualin April 18, Ningani khan Pukpui UPC Sunday School Hall-ah blood donation camp an huaihawt a, Christian Hospital, Serkawn tan mipa 24 leh hmeichhia 18 ten thisen unit 42 an pe. Womens Polytechnic NSS leh Red Ribbon Club pawhin Ningani khan Aizawl Civil Hospital tan thisen unit 31 an pe.
Easter Sunday
Naktuk Pathianni hi Isua Krista khenbeh a nih hnua a thawh lehna ni, Easter Sunday a ni a, Mizorama kohhran hrang hrangte'n an lawm dawn. Salvation Army band-te chuan varṭianah tawtawráwt hâmin, Isua thawh leh thu an puang dawn a, kohhran ṭhalai pawlte'n zing ni chhuah rualin Isua thawh lehna pualin sunrise service an hmang hlawm ang. Easter Sunday hi kohhran tam tak chuan thingpui ruai nen an lawm dawn a ni.
Tlan phal lo
Traffic SP chuan thupek chhuahin, April 22 aṭanga May 1, 2019 thlengin zing dar 9 aṭanga tlai dar 5 thleng Tlangnuam tlangzawl aṭanga Hridaikawn inkar kawngpuiah SIPMIU-in tui pipe phûm hna an thawh dawn avangin, hna thawh hun chhungin lirthei tlan phal a nih loh thu a tarlang.
Motor kâng
April 18, Ningani zan zanlai pelh, dar 1-2 inkar velah khan Lawngtlaiah car pakhat, bike pahnih leh scooty pahnih a kâng a, mi hâl a nih rin a ni. Thu dawn danin, Lawngtlaia motor kanna hmun hi L-IV leh Bazar Veng inrinna bulah a ni a; i10 Magna car MZ-07 5134 bakah, bike pakhat leh scooty pahnihte chu a kâng chhe hle. Hmun dang, Lawngtlai PS pêng bul maia Royal Enfield bike a kâng bawk.
MNYF-in mak ti
MNF ṭhalaite chuan thuchhuah siamin, UDPA sum hmanga Mizoram sorkarin Kolasib-a stadium a siam mek UDPA minister Zodintluanga'n April 16, 2019-a a tlawh chu mak an tih thu an tarlang. Sorkarin theihtawp a chhuah mek lai leh athletic track sei zawng dik lote siamṭhat dan tur a ngaihtuah mek laia contractor thlavang hauhah Zodintluanga an puh a ni.