MHIP Gen.Hqrs aṭangin branch 2 an chhuak
Mizo Hmeichhe Insuihkhawm Pawl (MHIP), Zarkawt branch leh Dawrpui branch-te chu April 18, 2019 khan MHIP General Headquarters aṭangin an inhnûkdâwk. Hetih lai hian, MHIP Gen.Hqrs. hruaitute chuan MHIP Gen.Hqrs. office bearers thlan theih loh chungchangah Aizawl Police Station-ah FIR an thehlut.
MHIP, Dawrpui branch leh Zarkawt branch hruaitute chu Ningani khan an ṭhukhawm a, MHIP Gen.Hqrs. kal dan a dik loa an hriat avangin Gen.Hqrs. an zawmna tihtawp an rêl a ni.
MHIP branch pahnihte hian press release siam nghalin, MHIP hmunpui an zawmna an tihtawp thu hi an puangzar nghal a; press release-ah chuan Zarkawt MHIP president Sainguri Sailo leh secretary Lalthanpuii te, Dawrpui MHIP president Tlangtinkhumi leh secretary Saplalduhsaki ten hming an ziak.
An press release-ah chuan, "Hun rei tak ata MHIP zahawm tak tihbawrhbân a ni fo mai hi pawi kan tiin kan ngaithiam thei lo a, heng thil zahthlak tak leh tenawm tak thleng fo thin hi tun hnuah chuang thleng fo tawh lo se kan tiin zahthlak kan ti tak zet a. Chuvangin, keini branch pahnih Zarkawt Branch MHIP leh Dawrpui Branch MHIP-te chuan MHIP General Headquarter kan zawmna hi tihtawp hrih ṭha kan ti a, vawiin April 18, 2019 (Ningani) hian MHIP Gen.Hqrs. kan zawmna aṭang hian kan inhnûkdâwk e," tiin an ziak a ni.
Hetih lai hian, MHIP Gen.Hqrs. hruaitute chuan MHIP Gen.Hqrs. office bearer thlan theih loh chungchanga mawhphurtu chhui chhuak a, a ṭul anga hmalak a nih theih nan Aizawl Police Station-ah FIR an thehut. Thu dawn danin, MHIP Gen.Hqrs. hruaitute chu MHIP office-ah an ṭhukhawm a, April 17, 2019-a office bearer thlan turah, chuh tuma hming pek luhte chu khawih chingpen ngei niin an hria a ni.
Tarlan tawh angin, MHIP hian April 16 aṭang khan Vanapa Hall-ah inkhawmpui an hmang a, April 17 khan kum 2019-21 chhunga office bearer turte thlang turin an inruahman a; mahse, inthlan kaihhnawihah Court-ah petition thehlut an awm avangin, Aizawl District Court chuan MHIP chu inthlang rih lo turin April 16 khan a hriattir a ni.