Lirthei rûk ching leh hralh chhâwng ṭhin YMA leh Police ṭangkawpin an man

Central YMA hnuaia Kumpuan Committee, SRS leh police ṭangkawp chuan tun hnai khan lirthei rûk chíng mi paruk leh lo hralh chhâwng ṭhin mi pakhat an man a, Inrinni khan Aizawl thlenpui niin, an thubuai neihna Kolasib Police-te'n an la nghal a ni.

CYMA Kumpuan Committee chairman R Lalngheta, CYMA vice president chuan, Bethlehem Vengthlang YMA-in ruihhlo ti ṭhin an man Lalhmingmawia inpuanna aṭangin lirthei rûk hmang hlawm khat an awm tih an hriat thu thuthar thehdarhtute a hrilh a, "Bethlehem Vengthlang YMA hian Lalhmingmawia hi SRS kutah an hlan a, thu zawhfiah zelna aṭangin lirthei rûk chíngte hi kan man thei a ni," a ti.

R Lalngheta sawi danin, Lalhmingmawia hian vaiho nen inthuruala lirthei an rûk ṭhin thu a sawi a, April 17, 2019 zanah pawh rûk tur hual lâwk an nei. April 17 zan hian SRS leh CYMA Kumpuan Committee-te'n lirthei rûk chíng chu an châng a, mahse, an man thei lo. Vaiho hian Lalhmingmawia an be pawp reng a, chu vang chuan an chêt tum dan YMA-in an hre zel thei a ni.

April 18, Ningani zan khan lirthei rûk chíngte chu an châng leh a, mahse, lirthei ru ṭhinte chu Khamrang lam panin an tlanchhia a ni. CYMA duty-te chuan an hriat veleh an ûm zui nghal a, Kawnpui Police leh Khamrang YMA-te an hrilh nghal a ni. April 18 zan khan hnam dang lirthei rûk ching mi parukte chu Khamrangah an man ta a ni. Inrinni khan Aizawl an thlenpui a, Kolasib Police ten an la nghal a ni.

Lirthei rûk chíng an mante chu - Sakib Uddinborbhuya (30), Silchar; Hussain Ahmed Lasker (25), Silchar; Samim Ahmed (20), Karimganj; Biju Sharma (33), Masimpur; Nurul Hoque Majumder (26), Silchar leh Abdul Hannan (25), Karimganj-te an ni.

Hnam dang paruk an mante inpuanna aṭangin, lirthei an rûk sa leisaka hralh chhâwngtu ber Zoremmawia (40) s/o Lal­thantluanga, Durtlang Leitan, Horticulture department-a driver chu man leh a ni. Zoremmawia hian lirthei rûk sate chu lei chhâwngin a hralh leh ṭhin a, a hralhna man chu lirthei rûk chíngte nen inberemin an insem leh ṭhin.

Lirthei rûk chíngten lirthei an ruk panga chu hmuh let a ni a, eng zat chiah nge an rûk tawh hriat theih a la ni lo. Lirthei hmuh lette chu 207 pick-up pahnih, SK tipper pakhat, LKP truck pakhat, Pulsar bike pakhat a ni. An lirthei ruk ṭhenkhat chu Manipur lamah an hralh niin an sawi.

R Lalngheta chuan, lirthei rûk chíngte chuan garage-a awm lo lirthei an chhinchhiah lâwk ṭhin tih sawiin, "Zan lamah an che chhuak ṭhin a, chahbi eng emaw zat an nei a, lirthei hrang hrang a mil a ni. Tuna kan mante hian anni lo lirthei rûk chíng pawl dang an awm thu an sawi. Lirthei bo chungchang report pawh kan dawn belh zel a ni," a ti.

Awlsam taka lirthei regis­tration tih theih a ni chu mang­anthlak an tih thu sawiin R Lalngheta chuan, "Ni khat lekah lirthei registration an lehlan thei a, tuna lirthei kan hmuh letah pawh hian number lem vek an hmang a ni," a ti a; lirthei registration chungchang chu Transport Minister sawipui an tum thu a sawi.