Tipper registration dik lo man

Mizoram Tipper Drivers & Owners Association (MTDOA) chuan April 20, Inrinni khan registration number dik lo hmang tipper pakhat an man.

MTDOA president Laltlanmawia sawi danin, Kolasib-a Mizoram Tipper Drivers & Owners Association hruaitute'n high security registration plate ni lo registration plate hmang tipper an hmu a, an rinhlelh avangin an ûm zui a; Aizawla bungrua a dah zo, Silchar lam a pan leh tur chu Rangvamual bula AMC leh Mizoram Tipper Drivers & Owners Association leivûng paihna hmunah an lo man a ni.

Laltlanmawia sawi zel danin, tipper an man hian document mumal a nei lo a, registration number inbel MZ-01 R-5954 chu Vahan-ah chuan Bolero pick-up a ni a, a neitu pawh Abu Hadi Mohammad Zakaria tih a ni. Tipper an man khalhtu chuan, tipper chu Nasrul Uddin Tamua, Karimganj district, Assam ta niin a sawi. Tipper leh a khalhtu hi police hnenah hlan a ni.