Zokhawthar aṭanga bungraw phurh March 25, 2019 aṭangin danchah a ni

Myanmar aṭanga Mizorama bungraw rawn lût, Zokhawthar aṭanga Mizoram hmun hrang hranga bungraw thawn darh ṭhin chu Champhai District Trade Union (CDTU) leh Zokhawthar Welfare Committee (ZWC)-te thu inhmuh loh vangin March 25, 2019 aṭang khan kalpui chhunzawm theih a ni lo.

Zokhawthar aṭanga Vanglaini thu dawn danin, Zokhawtharah hian Myanmar

aṭangin bungraw chi hrang hrang phurh luh ṭhin a ni a, chu'ngte chu Mizoram hmun hrang hrangah thawn darh ṭhin a ni. Kumin March 25 aṭang khan CDTU lamin bungraw phurte an dang a, tun dinhmunah bungraw chi hrang hrang cheng nuai 100 chuang man a tangkhang mek.

Myanmar aṭang hian plastic aṭanga thil siam chhuah te, blanket, electronic bungrua, kuhva, ei tur chi hrang hrang leh thil dangte lak luh ṭhin a ni a; bungraw tam tak chu China aṭanga Myanmar-a lut, Myanmar aṭanga Mizorama rawn lut leh a ni.

Vanglaini palai zawhna chhangin ZWC hruaitute chuan, bungraw phurh tur dan chungchangah Mizoram sorkarin thuphungin be mah se, mumal taka an la biak loh thu an sawi.

CTDU hruaitute chuan, sorkar nena inbiakna an neih loh thu Vanglaini palai zawhna chhangin an sawi a, "MJA lam palaiah an ṭang a, an ruahmannain kan inbia a ni. Passenger phur leh mimal motor kan dang lo a, bungraw phur motor chiah kan dang a ni," an ti.

CDTU leh ZWC-te hi bungraw phurtu lirthei aṭanga pawisa lak chungchang leh lirthei bungraw phurhtir danah an thu a inhmu lo a, kumin March thla khan Zokhawthar leh Champhaiah an lo inbe tawh. Inbe mah se, an thu a inhmuh theih loh avangin CTU lam chuan nimin thleng khan Zokhawthar aṭanga bungrua hmun danga phurh chhuah an la remti lo a ni.