Isua thawh lehna hlim taka lawm a ni

Nimin Pathianni kha Isua Krista kraws-a khenbeh a nih hnua a thawh lehna ni, Easter Sunday a ni a, Mizorama kohhran hrang hrangte'n hlim takin an lawm.

Easter Sunday hi Presbyterian Kohhran chuan zing ni chhuah aṭangin an hmang ṭan a, tualchhung kohhran hrang hrangte'n zing ni chhuah rualin KṬP bultumin Easter Sunrise Service an hmang. Mizoram Synod-in thupui thlan a nei a; chawhma inkhawmah thupui chu 'Thihna hnehin a tho leh ta' tih a ni a, chawhnu inkhawmah 'Tho leh Lalpa nena lên dun' tih leh, zan inkhawmah 'Amah angin kan tho leh ang' tihte a ni. Chawhma inkhawm bânah Isua thawh lehna lawm nan thingpui ruai an kîlho.

Salvation Army corps hrang hranga band-te chuan nimin zing varṭian aṭangin tawtawráwt hâmin, hmun hrang hrangah Isua thawh leh thu an puang a, chhun lamah hlim takin hun an hmang a, ei leh in turte an sem a ni.

Roman Catholic kohhran chuan Tumkau Ni aṭangin Hapta Thianghlim an hmang a, urhsûn taka Good Friday an hman hnuah, Inrinni zan khan Easter Vigil Mass urhsûn tak leh mei thar lakna hun an hmang. Easter Sunday hi khawvel pumah inang tlángin Catholic kohhrante chuan an hmang a, nimin khan Solemn High Mass hmangin, ruai nen thawh lehna an lâwm.

Baptist Church of Mizoram chuan nimin chawhma khan BCM hmunpui aṭanga thupui thlan, 'A sawi ang ngeiin a thawh leh tawh kha' tih hmangin thuchah an ngaithla a; BCM Headquarters, Serkawnah chuan kohhran pum huapin Pathian an chawimawi a, nilenga Pathian faka an zaikhawm bakah, tlaiah ruai an ṭheh a ni.

UPC (North East India) pawhin hlim takin Easter Sunday an hmang a, an hmunpuia hruaitute'n hmun hrang hrangah an hmanpui a ni.