KHAWTHLIR

Ṭanpuina hlan
Champhai KTM Family chuan April 19, 2019 khan Good Friday pualin charity ride an nei a, Champhai District Hospital-a awm mek damlo chhungkaw pathum hnenah ṭanpuina an hlan.

Tlawngah tla hlum
Lalbiaktluanga (23), Electric Veng, Aizawl chu April 19, Zirtawpni khan Tlawng lui, Sairang Balu kâiah a tla hlum a, Zirtawpni vek tlai dar 5:30 velah a tlakna aṭanga hla vak loah a ruang hmuh a ni. Thudawn danin, Lalbiaktluanga hi a ṭhiante nen Tlawng luiah an kal a, chawhnu dar 2 vel aṭangin a ṭhiante'n an hmu lo a, an zawng nghal a, Sairang YMA hruaitute an pun a ni.

CM relief fund
Hnahthial Group YMA chuan tun hnai khan Chief Minister's Relief Fund-ah Rs. 12,000 an pe a, Zemabawk North Branch YMA-in Rs. 10,000 an pe bawk.

MPS khawmpui
Mizo Photographers’ Society (MPS) chu Inrinni khan Central YMA Hall-ah an khawmpui a, chawhma lamah rorelin, chawhnu lamah kum 2019-2020 chhunga hruaitu tur an thlang. MPS hian Ai­zawl­ah general hqrs. neiin Serchhip, Champhai, Khawthlang (Hachhek tlangdung), Tlabung leh West Phaileng-ahte branch an nei mek a ni.

Thisen pe
Inrinni khan ṬKP Ramhlun Pastor Bial chuan Ramhlun North BCM biak-inah blood donation camp huaihawtin, mipa 63 leh hmeichhia pangain Aizawl Civil Hospital tan thisen unit 68 an pe. ṬKP Lawng­tlai Bazar Unit pawhin Lawngtlai District Hospital-ah thisen unit 17 pein, petute mipa 12 leh hmeichhia panga an ni. Zemabawk North Bial KṬP-ten Zemabawk North Kohhran Hall-ah Synod Hospital tan thisen unit 36 an pe a, petute mipa 33 leh hmeichhia pathum an ni. Champhai Bethel Branch YMA member mipa 37 leh hmeichhia pangate'n Champhai District Hospital tan thisen unit 42 an pe a; LIKBK Ṭhalai Pawl, Bualpui (NG) Regional Churches Council pawhin Siaha District Hospital tan unit 40 an pe a, petute mipa 38 leh hmeichhia pahnih an ni.