Kut inthlak thu-ah Sairang khawtlang lungawi lo

Sairang khawtlang hruaitute chuan, an khaw tlangval pathumte Aizawla Armed Veng South leh Salem Veng mi eng emaw zatin April 19, Zirtawpniah Tlawng luiah kut an thlâk rawn avangin an lungawi lo hle tih an sawi a; kut thlaktute chu an mi hliamte inenkawlna senso tum vek tur leh lawngleng an tihchhiat man chawi turin an phût.

Kut inthlak rawn chungchangah hian Sairang Joint V/C leh All NGO hruaitute chuan April 20, Inrinni khan Aizawl Press Club-ah thuthar thehdarhtute an kâwm a; Sairang VC president Vanrammawia chuan, an tlangval pathum kut thlaktute chu mi 12 vel an nia an hriat thu leh, an zinga mi pali - F Lalruatsanga, Lalrintluanga leh Ramding­liana Armed Veng South mi vek leh, Nicky Lalnunmawia, Salem Veng, Aizawl-te chu police-te'n an man tawh thu a sawi.

Sairang khawtlang hruaitute sawi danin, Tlawng luia Sairang naupangte'n lawngléng an dahṭha tur chu kut thlaktute'n lawnga chuan an dil a, an remtih loh avangin an tibuai zui a ni. Naupangte mangang chuan an bul hnaia awmte an pun a, thil awmzia ngaihvena tura kal Sairang tlangval pathum chu Armed Veng South leh Salem Veng mite chuan kut an thlak a ni.

Kut tuar mi pathumte chu an hliam vek a, Sairang damdawi-in panpui an nih hnuah, Aizawl Civil Hospital lamah thawn an ni. An zinga mi Vanlalhriatpuia chu a lu-ah a hliam a, damdawi-inah admit a ni a; Vanlalmal­sawmtluanga chu a bán ruh a tliak a, Lalruatfela pawh a taksa hmun ṭhenkhatah a hliam bawk.

Sairang khawtlang hruaitute chuan, an khaw tlangval pathum kut thlaktute chuan thingfak, lung leh hmanrua an neih ang ang an hmang a, an bul hnaia awm Venghlui tlangvalte'n chhan lo phei se, an nunnain a tawrh hial an rin thu an sawi.

Sairang VCP Vanrammawia chuan, an naute kutthlaktute chu man chhuah a, dan anga an chunga hremna lek ngei turin thuneihtute an phût tih a sawi a, "Kut tuarte inenkawlna senso zawng zawng pawh kut thlaktute hian tumsak vek turin kan phût a, Sairang mipuite eizawnna ber balu lâkna atana lawngleng leh a kháwl an tihchhiat man pawh tum vek turin kan phût a ni," a ti.

Vanrammawia chuan, Sairanga Tlawng luia intihlim tura kal ṭhinte'n lui dunga huan te, balu lakna lawng leh hmanruate an tichhe fo tawh nia sawiin, chutiang thil ṭha lo chu thleng tawh lo se an duh thu a sawi a; luia intihlim tura kal zingah naupang hmuha mawi lo khawpa mipat hmeichhiatna lam thila khawsa an awm ṭhin pawh awm tawh lo se an duh thu te, mawi lo taka khawsa an hmuhte chungah action an lak tawh dawn thu te, buaina dang a chhuah tawh loh nan lui dungah duty an indah tawh dawn thute a sawi bawk.