MIECHA-in ram dang bungrua dan an tum

Mizoram Importer and Exporter Code Holders' Association (MIECHA) hruaitute chuan Inrinni khan Aizawl Press Club-ah thuthar lakhawm­tute an kâwm a; foreign trade hnuaia phalna nei loa Mizorama bungraw lak luhte chu April 24, 2019 aṭangin dan an tum thu an puang.

MIECHA Working Committee chairman R Lalruatfela chuan, an pawl chu sorkar laipuia Ministry of Commerce & Industry hnuaia Foreign Trade department-in Import & Export License a pekte an ni a, Mizoram sorkar hnuaia Firm & Society-ah an inziak lut niin a sawi.

R Lalruatfela chuan, India Foreign Trade Policy hnuaia Act East Policy kalpui mek chu Zo fate tan din khawchhuahna tur a nia sawiin, "Ṭhalai tam tak tan eizawnna an hmuh theihna tur a ni a, Zo fate inpumkhatna atan a ṭangkai hle dawn a ni," a ti a; chutih rualin, inbuatsaihna leh inpuahchahna ṭha a ngaih thu a sawi.

Aizawla bungrua, ram dang aṭanga lakte chu dan ang taka lak luh a nih chuan fel taka chhiah pe a, maximum retail price mumal tak nei tur a nih thu sawiin Lalruatfela chuan, "Dan loa sumdawngte avangin rate mumal a awm thei lo a, dan lo leh sorkar hriatpui­na tel loa pawisa chawi a tam avangin bungrua inang reng pawh a man a inthlau nasa hle a, a tuartu chu mipui an nih avangin, hei hi a tàwp theih nan hmalak kan tum ta a ni," a ti.

MIECHA hian ram dang aṭanga bungraw lak luh kaihhnawihah, ram pum tana hlâwkna ni thei tur chu mi tlemtê chauhin an chhawr ṭang­kai a, mipui a thlawh khûm mek avangin, ram dang nena insumdawn tawnnaa phalna nei loa bungrua kal reng reng chu April 24 aṭangin an dang dawn tih an sawi a; an hmalakna thláwp turin Mizoram mipui an ngen a ni.