Zu khap a nih theihna atan sorkarin theihtawpin hma la - MNF ṭhalai

MNF ṭhalai chuan thuchhuah siamin, chief minister Zoramthanga kaihhruai sorkarin MLA inthlan hmaa a aupui tawh angin, Mizoramah zu khap a nih theihna atan theihtawpin hma a lak nghal thu an tarlang.

MNYF chuan, Mizoram sorkarin zu zawrh titawp turin kawng hrang hrangin hma la mah se, Congress sorkarin zu a zawrhtirte'n March 31, 2019 thleng zawrh phalna an neih avang leh zu zawrh duhtute'n Court-ah thubuai an put luh avangin zu zawrh tihtawp nghal bur theih a nih loh thu an tarlang a, "March thlaa Assembly session-ah zu khuahkhirhna dan Mizoram Liquor (Prohibition) Bill pass a ni tawh a, Lok Sabha MP inthlan avangin notification tihchhuah hman a ni lo a, Congress sorkar zu zawrh kal zel hi MNF sorkar kutah a tla lo thei lo," an ti.

MNF ṭhalai chuan, Lok Sabha MP inthlan vanga Model Code of Conduct-in a phuar loh chinah sorkarin zu a khuahkhirh nghal dawn thu tarlangin, "Mipuite'n min lo hriatsak se kan duh hle. Zu do kawnga tlawmngai pawla tawn­hriat ṭha tak nei, zu duh lotu kohhran mi tak Excise minister Dr K Beichhua kan nei hi a vanneihthlak kan ti hle," an ti a; Excise Minister leh a hote'n hun rei lote chhunga zu khuah­khirhna dan an duang chhuak chu an chhuan thu an sawi bawk.